水晶宮與曼城自足總盃八強起均展現出強大嘅競爭力，雙方接連淘汰英超對手晉級決賽，為今晚呢場足總盃決賽增添咗唔少睇頭。

水晶宮教練加士拿講到同曼城嘅對碰：「我教水晶宮以嚟對過曼城三次，場場都係入兩球，但當中就只係有一場係和到，即係我哋係有能力入到曼城波，但防守方面就需要更為穩健。」大家都對上個月兩隊喺英超嘅對賽記憶尤新，嗰場波曼城主場以5比2大勝到訪嘅水晶宮，曼城生涯進入倒數階段嘅中場核心迪布尼（Kevin De Bruyne）表現極為突出，唔單止攻入精彩嘅自由球，更錄得一個出助攻，似係要趁離隊前獻出所有。當時儘管前鋒夏蘭特（Erling Haaland）仍未復出，但馬莫殊（Omar Marmoush）同高華傑治（Mateo Kovacic）嘅積極跑動都足以令水晶宮球員疲於奔命（佢哋兩個都有喺呢場入波）。咁不過，呢場聯賽係曼城失波在先，而且係一失就連失兩球，門將艾達臣（Ederson）兩次判斷失誤需要負上好大責任。此外，曼城面對水晶宮快速嘅兩翼反擊時一度顯得被動，可以預期曼城就算季尾表現重回正軌都仍未係做到滴水不漏。水晶宮方面，呢場有入球嘅伊斯（Eberechi Eze）與及有助攻嘅伊斯美拿沙亞（Ismaila Sarr）嚟緊喺足總盃決賽都會依然係水晶宮嘅入球希望。

不經不覺，曼城已係連續第三年殺入足總盃決賽（之前兩屆同曼聯各贏一次）。睇返今季英超，動蕩咗大半季嘅曼城總算爬番上前五，下季能否踢歐聯都仍可以靠自己努力爭取，假如最終順利保得住歐聯席位，今晚佢哋就算贏到足總盃都只係換到歐霸入場券，即係會拎番出英超去益第七名。只不過曼城今季盡出洋相，足總盃已係全季僅餘可以爭嚟慰勞一下大軍嘅安慰獎，加上球隊上下都應該想用個盃為迪布尼送行，戰意理應唔需要懷疑。從水晶宮角度睇，今場決賽失手嘅話，佢哋喺聯賽亦已經好難爬到上第八名去踢歐協聯，因此今場決賽已係佢哋進軍歐賽嘅最後機會。