阿仙奴同曼城，周中喺歐聯主場出戰命運各異，阿仙奴擊敗利華古遜相對較輕鬆，曼城就要為首回合三個失波傾力反撲，最後亦未能修復失地敗於皇馬出局。兩隊今季聯賽已經鬥到難分難解，爭冠去到直路，先要過聯賽盃一關。論近況，阿仙奴喺聯賽同歐聯成績都唔錯，相反曼城近期各項賽事表現乏力。曼城係盃賽決賽嘅常客，阿仙奴對上一次打入大賽決賽，已經係2020年足總盃，呢個亦係阿迪達作為阿仙奴主帥嘅第一個錦標。阿仙奴目標仍然係四冠，而剛歐聯出局嘅曼城，希望先拔頭籌，顯示自己有挑戰阿仙奴嘅爭冠實力。呢次聯賽盃決賽，亦係首次由實力接近嘅英超榜首對第二。

 

阿仙奴淘汰維爾港同白禮頓之後，第五圈主場對水晶宮係最驚險一場。臨完場靠對手烏龍波領先，補時被對手追和，互射十二碼到突然死亡先贏波晉級。四強對車路士首回合作客3:2反勝，次回合主場由夏維斯(Kai Havertz)補時絕殺1:0。兩回合總比數贏4:2晉級。呢兩場展示咗阿仙奴嘅韌力同後勁，亦係佢哋今季具代表性嘅逆境勝仗。呢場決賽，因傷錯過周中對利華古遜嘅奧迪哥特(Martin Ødegaard)同添巴(Jurriën Timber)以及射入歐聯開齋波但下半場因膝部問題被換出嘅艾斯(Eberechi Eze)，三人未知能否上陣。

 

曼城嘅晉級過程比阿仙奴輕鬆，先贏哈特斯菲爾德及史雲斯，八強贏賓福特，四強兩回合以壓到性優勢5:1淘汰衛冕冠軍嘅紐卡素。哥迪奧拿賽前記招就事先張揚決賽會派二號門將查福特(James Trafford)把守最後一關。古希(Marc Guéhi)因盃賽資格限制將未能上陣，佢嘅對抗力、預判同出波能力都無法被完全取代，曼城後防更易受壓於阿仙奴嘅高位逼搶。死球防守亦因失去佢嘅空中優勢而變得脆弱，古希缺陣會係曼城決賽前隱患之一。

 

兩隊實力平均，單場決戰下戰術狀態都不可缺少。曼城有豐富決賽經驗，阿仙奴要喺對手未完全站穩陣腳之前，用高位攻勢壓迫令對手失誤。面對今季歐洲死球之皇，曼城要小心阿仙奴邊路快攻，避免單對單時出現犯規、死球，甚至黃牌，為對手製造有利局面。若曼城兩翼同中場協防成功，阿仙奴進攻會被迫轉向中路，威力就會減弱。

 

阿迪達近八次喺溫布萊以球員同教練身份出戰都係不敗，阿仙奴所有賽事近七戰六勝。對手曼城本來亦朝着四冠進發，周中失咗隻盃，近五場賽事亦只得一勝，雖然曼城九個聯賽盃決賽只係輸過一次，但哥迪奧拿近年對住徒弟未有優勢，近六次交手都未能勝出。阿仙奴牌面似乎高一線，但兩隊實力接近，勝負好睇兩隊臨場表現。