利物浦史洛嘅領隊職業生涯中，從未試過連輸兩場，不幸地呢個紀錄喺利物浦第一季就破左，仲發生喺全季最重要嘅兩場賽事。

 

筆者作為利迷，首先要恭喜紐卡素70年來再奪盃賽錦標。今次贏得實至名歸，戰略部署，執行，爭勝心全部都比利物浦優勝，聯賽盃冠軍隻盃，你哋值得擁有。

 

至於利物浦，由季初到季中一直氣勢如虹。史洛改變左上季高普嘅高強度踢法，場內踢養生波，場外用新訓練方式，球員傷患情況大大改善。二月份15日踢5場，都能夠安然渡過，唯獨去到最重要嘅三月份就非傷即疲。其一係今季帶起成隊波嘅沙拿正值齋戒月體力不足，另外就係大部份主力大小賽事踢足，特別係中場三子更加踢到乾塘，加芬比連腳都提唔起，更遑論轉身帶波上前助攻。利物浦雖然未有一個明確嘅plan B，史洛手上副牌仍然可以藉遠藤航、艾利亞治、基艾沙等做微調，三個今季都證明咗自己有改寫戰局嘅能力。基艾沙自足總盃出局後就一直坐冷板凳，佢喺聯賽盃決賽上陣十幾分鐘，嗰種拼勁同埋門質素，絕對係球隊近期啞火嘅救星。

 

嚟到下半季，史洛喺換人調動上越見保守，自己信賴嘅班底委以重任都可理解，畢竟有乜行差踏錯就隨時孭大鑊。首季降落英超，相信仍然係學習中，始終英超冇遏冬，聯賽加兩個盃賽競爭激烈，球員都係人，精神體力亦會有用完嘅一日。上季同一時間，利物浦喺足總盃被曼聯淘汰出局，就係崩盤嘅開始，最後拱手相讓聯賽冠軍。今季聯賽早早帶開十幾分，利物浦餘下九場聯賽五勝一和已經可以奪冠。但時間情節上嘅巧合，難免令人聯想到利物浦實在有必要增強後備兵源，以防去到爭標直路又再歷史重演。錢解決到嘅問題就唔係問題，而對利迷嚟講，個問題可能係FSG。