今個禮拜輪到德甲開鑼！話說DFL今季殺入英國，搵咗當地兩個大型YouTube睇波頻道The Overlap與及That's Football轉播今季廿場週五波，喺英國嘅朋友到時可以留意會唔會即刻播到今次要介紹嘅呢場揭幕戰拜仁對萊比錫。

先講RB萊比錫，上季佢哋表現反覆向下，去到季尾筆者亦都破天荒一連三週「追擊」RB，就係估到佢哋將會無力回天。最終佢哋以一分之差連歐協聯席位都拎唔到，可想而知原有班星會將會走得幾快。相信大家都留意到RB嘅中鋒錫斯高較早前已經高價投奔曼聯，剩低嘅最大粒星沙維西蒙斯（Xavi Simons）亦已盛傳想過車路士。喺剛過去嘅德國盃首圈西蒙斯仍有出戰，喺雲達打響名堂再轉過來RB嘅教練奧利雲拿亦已出動到現時最強陣容以4:2擊敗辛特侯遜，但嚟緊會點將會係一個大問號。

西蒙斯想跟埋錫斯高去英超，當中涉及球會間複雜嘅四角關係：首先係車路士目標已十分明確，就係買到加拿曹同埋西蒙斯，先會放走手上嘅尼干古與及尼高拉積遜。單講尼干古呢條線，拜仁其實上季歇冬已經想借佢回歸德甲，但不論係當時嘅尼干古、以至家陣車仔自己，都係只想賣斷而唔係暫借。傳聞車仔都有向RB兜售尼干古回巢，但尼干古眼見RB今季只能應付本土兩條戰線，當然係耍手擰頭。

拜仁方面，季初引進路易斯迪亞斯（Luis Diaz），計落都只係算cover到京士利高文轉投艾納斯帶嚟嘅空檔，中前場多面手梅斯亞拉頭半季嘅缺口仍然未解決。所以大家最近會聽到拜仁無啦啦想搶埋加拿曹一份（亦當然係俾人秒殺），但人哋都已情傾車仔邊有得搶。更有消息指拜仁大老爺漢尼斯已下令，京士利高文嗰筆意外之財唔會全數掟番入轉會市場。儘管拜仁上週六出戰德超盃輕取史特加，渡過咗梅斯亞拉+艾方素戴維斯長期缺席嘅首場正賽挑戰，但明眼人都知拜仁依家陣容深度僅屬一般，出到歐聯未必夠用，如果閂水喉傳聞屬實，教練甘賓尼想趕喺夏窗關閉前補強就難上加難。

最新傳聞係，西蒙斯將會踢完呢場德甲揭幕戰就會宣佈bye bye，RB嚟緊假如冇埋西蒙斯，單靠原有嘅紐沙（Antonio Nusa）以及新喺燕豪芬買入嘅另一翼鋒巴卡約高（Johan Bakayoko）恐怕都唔會咁快起到火花，踢最前嘅奧賓達（Lois Openda）將要孭起更多責任（斟唔斟到利物浦攻中哈維艾利洛則屬後話）。但另一方面，《踢球者》仍然預測西蒙斯星期五晚正選上陣，咁如果佢又確係預咗賽後走人，呢場揭幕戰佢可以交出幾多成嘅貨呢？（拜仁慕尼黑X圖片）

 

預計兩隊正選陣容：

【拜仁慕尼黑】
Neuer - Laimer, Upamecano, Tah, Stanisic - Kimmich, Goretzka - Olise, Gnabry, Luis Diaz - Kane

【RB萊比錫】
Gulacsi - Baku, Orban, Lukeba, Raum - Seiwald - X. Schlager, Xavi - Diomande, Nusa - Openda