科隆自升班以嚟，透過一系列精明嘅轉會操作與及有效嘅戰術安排，展現出驚人嘅競爭力。儘管防守方面有中堅雲丹貝治繼續因傷缺陣，整體後防深度仍有多名可靠球員支撐。此外就更不得不提科隆嘅進攻多點開花：畢達（Marius Bülter）係科隆今季嘅重要收購，已經32歲嘅佢喺賀芬咸表現只算係不過不失，點知嚟到科隆推前踢中鋒成績令人喜出望外，開季頭三場就已經取得兩個入球+兩個助攻。此外教練華斯尼奧克亦係知人善任，成功發掘到借將翼鋒卡明斯基（Jakub Kaminski）同埋艾馬拉（Said El Mala）兩位年輕翼鋒嘅潛能。年僅19歲嘅艾馬拉已經打入德國U21隊，依家已成為科隆嘅秘密武器，佢三場夾埋只係落場70分鐘就已射入一球交出一個助攻，能喺比賽中帶嚟關鍵突破。科隆開季頭三場對手可以話係相對唔強，今個星期六德甲尾場作客剛剛喘定嘅RB萊比錫，大家不妨視之為較有參考價值嘅一仗。

主隊RB萊比錫今季前鋒線星味大減，德甲揭幕戰俾拜仁大炒一場之後靠贏海登咸、緬恩斯止血，嚟緊希望可以搵番啱個定位走出困境。今季接過隊長臂章嘅左閘大衛拉林（David Raum）助攻助守，喺場上嘅表現與及領導能力將會對球隊重建起關鍵作用。今場主場迎戰當頭起嘅科隆，RB萊比錫需要證明自己嘅調整成效並唔係曇花一現。

 

預計兩隊正選陣容：

【RB萊比錫】
Gulacsi - Baku, Orban, Lukeba, Raum - Seiwald - Banzuzi, Baumgartner - Bakayoko, Romulo, Diomande

【科隆】
Schwäbe - Schmied, Hübers, Krauß - Sebulonsen, Johannesson, Martel, Lund - Kaminski, Maina - Bülter

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。