05/04/2026 史特加 vs 多蒙特

足球資訊 | 德國甲組足球聯賽(2025/26) | 發布日期: 03/04/2026

比賽日期	主隊	客隊	主勝機率	和局機率	客勝機率
2026-04-05 00:30	多蒙特	史特加	42.6 %	24.6 %	32.8 %

主勝機率	和局機率	客勝機率
42.6%	24.6%	32.8%

排名: 德甲(3) vs 德甲(2)

直播資訊: Now 639, NowE, beIN Sports

史特加星期六尾場用嚟「招呼」多蒙特嘅主場館MHPArena，實情亦即係星期一德國用嚟同加納踢友賽嘅場館。話晒喺史特加踢，現場觀眾焦點自然落喺主隊王牌安達夫（Deniz Undav）身上。安達夫報到前先至喺德甲作客奧格斯堡獨取兩球兼有一次助攻，幫史特加大勝5:2兼重返聯賽榜第三位，計落已係聯賽連續六場有波入，狀態極之火熱，全季入球數字雖然點都唔會望得到拜仁嘅哈利卡尼車尾燈，但23場累積18球排第二已係十分亮麗嘅成績。

嚟到現場睇友賽嘅球迷自然以史特加fans佔多數，佢哋等咗成個上半場都只係見到得中場安祖路史迪拿（Angelo Stiller）在場中，就梗係唔順氣係咁嗌晒安達夫個名。而下半場入替嘅安達夫亦冇辜負一班江東父老嘅厚愛，第88分鐘射入奠定勝局一球。只不過遺憾嘅係，一去到德國國家隊，教練拿高士文心目中自有另一套計法：安達夫就算有幾突出都只能安份守己喺攻中位置排老三（首選梅斯亞拉，今期俾佢休息正選位置落入基拿比手中），唔會諗住俾佢轉打最前試一試其他可能。同隊嘅史迪拿兩場友賽都有落場，但同成隊波嘅默契都只係一般，都唔好講左翼富列治（Chris Führich），佢得到嘅機會比安達夫只會更加少。全隊上下理應趁今場為同日生日嘅史迪拿沖喜一下，將怨氣化為再喺主場爭勝嘅動力。

論形勢，史特加排第三，如果今場贏到波就可以同後面嘅RB萊比錫拉開距離，而排名高一位嘅客隊多蒙特依家已經拋開史特加八分，源動力未必有史特加咁高。數往績嘅話，多蒙特更係近七場正賽對住史特加從未取勝，首循環亦要打到3:3，兩度領先之下都要俾史特加追平，而當日獨力射入三球嘅球員，正正就係安達夫。

至於多蒙特嘅德國國腳，喺國家隊都冇乜優勢，暫時計落係得防中菲歷斯尼美查（Felix Nmecha）、中堅舒洛達碧克（Nico Schlotterbeck）較為穩陣，其他譬如布蘭特（Julian Brandt）以至艾迪耶美（Karim Adeyemi）都已經邊緣化。今期尼美查有傷，舒洛達碧克喺德國隊穩坐正選位但亦出現失誤，後者同多蒙特傾續約又有暗湧：事源體育總監基爾突然離隊，傳出多支豪門吼實嘅舒洛達碧克即時hold住要同繼任人重新開始傾過，而喺咁嘅大環境下一眾「蜜蜂仔」應已預咗下季又會大變天，需要為自己前途作打算，加上爭標希望已變渺茫，陣中最俾力嘅恐怕已要數到新一年出場時間大增嘅意大利U19新秀中堅雷基亞尼（Luca Reggiani）。

預計兩隊正選陣容：

【史特加】
Nübel - Vagnoman, Hendriks, Chabot, Mittelstädt - Karazor, Stiller - El Khannouss, Undav, Führich - Demirovic

【多蒙特】
Kobel - Reggiani, Anton, N.Schlotterbeck - Ryerson, Sabitzer, Jobe Bellingham, Svensson - Brandt, Beier - Guirassy

分類:

足球資訊

05/04/2026 史特加 vs 多蒙特

分類:

標籤:

關於我們:

快速連結:

聯絡我們: