德甲賽前分析(24/01/2026-26/01/2026)

足球資訊 | 德國甲組足球聯賽(2025/26) | 發布日期: 22/01/2026

24/01/2026 03:30 聖保利(德甲18) vs 漢堡(德甲14)

第二回合「漢堡打比」同樣安排踢星期五免生枝節。聖保利上場作客最後關頭先至俾多蒙特反勝，輸咗三分但贏到默契同士氣，哪怕下週三加插一場對RB萊比錫嘅補賽都唔會喺今場有所保留。

24/01/2026 22:30 拜仁慕尼黑(德甲1) vs 奧格斯堡(德甲15)

拜仁上場聯賽RB唔留手（兩回合共入11球）反而係歐聯留手，近六次聯賽輸晒兼夾歇冬後未贏過波嘅客隊奧格斯堡恐要自求多福。

24/01/2026 22:30 利華古遜(德甲6) vs 雲達不來梅(德甲13)

利華古遜衰開有條路，門將Flekken受傷長唞轉頭喺歐聯作客奧林比亞高斯淨輸兩球。客隊雲達人手有限，會寧願趁利華勢頹搏多次（首循環3:3），定還是留力星期三番到主場補賽硬撼今季雙殺利華嘅賀芬咸？

24/01/2026 22:30 法蘭克福(德甲7) vs 賀芬咸(德甲3)

法蘭克福近10場1勝4和5負，炒埋教練都未能解決防守問題，星期三歐聯作客卡拉巴克竟然失夠三粒，門將Santos壓力就快爆煲。賀芬咸德國盃出局之後踢出6勝2和1負超好成績，暫時踢少一場都仍然上到第三名。

24/01/2026 22:30 緬恩斯(德甲17) vs 禾夫斯堡(德甲12)

緬恩斯兵行險著歐協聯直接出線，今個星期亦冇週中賽事，加上客隊中場隊長Arnold停賽，今仗大可嘗試積極搶分。

24/01/2026 22:30 海登咸(德甲16) vs RB萊比錫(德甲5)

以現有人腳而言RB萊比錫仍在海登咸之上。俾拜仁兩回合雙炒唔緊要，縱使主隊歇冬之後防守有所改善、自己個中場Ouedraogo又要抖幾個月，RB大概早學識放下執番啲應該要到手嘅分數。

25/01/2026 01:30 柏林聯(德甲9) vs 多蒙特(德甲2)

柏林聯主場對多蒙特往續算係硬淨（四勝二負），而多蒙特繼只能險勝柏林聯後再喺歐聯作客熱刺輸波，隨時會再令多仔出現尷尬狀況，但需留意柏林聯今場有後衛Köhn停賽。

25/01/2026 22:30 慕遜加柏(德甲11) vs 史特加(德甲4)

史特加近一星期兩場德甲、歐霸只做了少量輪換，下星期四想爭取直接出線的話今仗將難免有更大調動。慕遜加柏歇冬後只曾贏過奧格斯堡，嚟緊寄望復出嘅右翼Honorat可以進一步提升落場時間並增加貢獻。

26/01/2026 00:30 弗賴堡(德甲8) vs 科隆(德甲10)

弗賴堡踢歐霸前景比史特加好些少，直接出線機會唔細，下星期四作客里爾壓力稍減，而科隆亦只係獲得九場波以嚟嘅首場勝仗，兩隊狀態分野會比首循環科隆主場大勝4:1時要收窄。