相隔一週，德甲前列位置又試洗牌：多蒙特主場臨完場入波都未能贏到最後，俾史特加追平3:3，第三名嘅位置俾輕取禾夫斯堡嘅利華古遜佔據咗。兩隊喺今個星期二嘅歐聯賽事同樣告捷，而下週中又會喺德國盃再度碰頭，兩隊一週兩賽嘅攻防博奕將會引人入勝。

有留意開我哋網站嘅朋友大概會留意到，2025/26球季開賽至今我哋幾乎冇講過利華古遜，實情自從坦夏兩場貨仔即炒、前丹麥國家隊教頭曉文接火棒，都預咗利華喺重建期間表現將會極為飄忽，分析完踢出嚟都未必係嗰回事。而自踏入十月以嚟，利華古遜喺德甲表現相當搶鏡，取得咗五勝一負嘅佳績，咁當然一大原因係對手相對更弱，六隊之中除咗拜仁慕尼黑之外都屬於下半版嘅球隊，而利華亦都喺歐聯前夕作客拜仁疑似冇出盡全力、輸夠三蛋。

撇除呢啲外在嘅有利因素，利華今季大執位後終於見到部分新收購球員上力，確係幫曉文分擔咗部分壓力。例如沙比走人前最後一位拉攏加盟嘅中場伊巴謙馬薩（Ibrahim Maza），就憑住良好嘅傳球視野、出色嘅跑動範圍同埋防守能力，喺中場陷入人才荒嘅時候及時接棒，而快翼樸古（Ernest Poku）更已被視為同鄉費林邦離隊之後嘅最佳代替品。利華古遜星期二作客曼城爆大冷取勝，固然可以話係曼城疏忽大意，但亦都可以留意番近期基莫度推上中場，馬薩、樸古入局，已間接造就中鋒舒希克（Patrik Schick）重拾射門鞋，一場作客曼城大戰亦令從賓福特來投嘅門將菲利根（Mark Flekken）踢番場爭氣波、屢救險球一吐烏氣，整體對利華嘅默契以至士氣都一定有正面作用。嚟緊番到聯賽陣容或者會有所調整，但呢個時候又有失落歐聯名單嘅33歲攻中荷夫曼（Jonas Hofmann）發威，多蒙特作客要過利華呢關已經唔係咁容易。

今季多蒙特嘅軌跡又確係夠千奇百趣，既可以4:1大炒畢爾包、再嚟4:0血洗維拉利爾，又同時「歐聯醒神、聯賽失魂」，同期德甲則只踢出兩勝三和，單睇數字就及不上利華古遜，而近兩場接連俾漢堡、史特加追平，「多仔後防唔夠集中」呢個老調就不得不重彈。單以預測陣容嚟睇，多蒙特隨時比主隊利華古遜更加人強馬壯，但始終實戰又可能係另一回事，兩隊喺歐聯後嘅調整、為下週中德國盃重逢嘅盤算博奕，都足以令兩隊今季嘅首次會戰增添變數。（利華古遜X圖片）

預計兩隊正選陣容：

【利華古遜】
Flekken - Quansah, Badé, Tapsoba - Aleix Garcia, Maza - Hofmann, Tillman, Grimaldo, Poku - Schick

【多蒙特】
Kobel - Anton, Can, N.Schlotterbeck - Ryerson, F.Nmecha, Bellingham, Svensson - Adeyemi, Chukwuemeka - Guirassy

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。