01/03/2026 多蒙特 vs 拜仁慕尼黑

足球資訊 | 德國甲組足球聯賽(2025/26) | 發布日期: 26/02/2026

比賽日期	主隊	客隊	主勝機率	和局機率	客勝機率
2026-02-26 17:06	多蒙特	拜仁慕尼黑	33.4 %	19.9 %	46.7 %

主勝機率	和局機率	客勝機率
33.4%	19.9%	46.7%

排名: 德甲(2) vs 德甲(1)

直播資訊: Now 639, NowE, beIN Sports

近期德國嗰邊不斷吹奏多蒙特喺德甲有幾勁、又講到佢哋準備追趕長佔榜首嘅拜仁慕尼黑。單計積分嘅話，蜜蜂兵團今季踢23場累積52分，確已係佢哋德甲史上第四好嘅成績，+27嘅得失球差除番亦已超過場均一球，唔計落後拜仁八分嘅話，數字上呢隊多蒙特確係勁嘅。

但嚟到星期三歐聯十六強附加賽次回合，多蒙特帶住兩球落場都要輸凸，最終俾亞特蘭大以總比數4:3淘汰。首回合後衛唔夠人嘅問題嚟到次回合客場先至全面爆發，安頓（Waldemar Anton）單天保至尊頂到首回合，但次回合亦只係等得到安利簡（Emre Can）趕及復出，舒洛達碧克（Nico Schlotterbeck）則只能全場坐喺後備席幫唔到手，如果週末對拜仁仍未能夠復出，多蒙特嘅防線能否守得住場均幾乎入到3.7球嘅拜仁，都頗成疑問。

進攻方面，教練尼高高華傾向首先派遣比亞（Maximilian Beier）、白蘭特（Julian Brandt），為中鋒古拉斯（Serhou Guirassy）喺左右兩邊開路。但白蘭特今季助攻大幅度減產（只有兩個，而且都喺上半季做出），比亞入波係多但細睇之下原來大部分都係喺弱旅身上取得，呢個問題亦反映咗成隊多蒙特今季嘅處境：雙殺緬恩斯、柏林聯兩邊各淨袋六球、淨勝雲達不來梅3:0，對住弱旅多蒙特可以盡贏，但對弗賴堡僅和1:1、對法蘭克福踢得出3:3，面對RB 萊比錫則係兩循環打和，隱約睇得出多蒙特面對同級對手其實唔係咁有把握。就例如上週作客萊比錫，補時追平嗰球咪又係來自艾迪耶美（Karim Adeyemi）助攻，但當以為尼高高華係留力歐聯，最終艾迪耶美作客阿特蘭大亦只係踢咗廿分鐘兼射入破蛋入球。對於尼高高華點樣使用艾迪耶美，相信一眾球迷都早已彈出唔少問號。

睇番今季幾支一度衝上聯賽榜第二、三名球隊，例如賀芬咸（兩循環2:9）、萊比錫（兩循環1:11）、史特加（首循環0:5），平時就算踢得幾有水準、連贏幾多場都好，只要一碰著拜仁都會踢到焦頭爛額。甘賓尼執教拜仁嚟到第二年陣腳漸穩，更多踢番自己最熟路嘅前場緊逼，對任何一隊都唔手軟，亦令多支所謂嘅「追趕者」吃盡苦頭。但就快「四張」嘅門神紐亞一傷，後防就容易顯露問題。就例如上仗對法蘭克福，頂替紐亞嘅二號門將埃碧（Jonas Urbig）發揮只能話係合格，更大問題係佢同幾位後防之間仍係稍欠默契，埃碧呢兩季落場實戰機會唔算少，但踢起嚟仍似係一個未長大嘅大隻仔，間中可以好強但未至於完全令人放心。進攻方面，攻中梅斯亞拉（Jamal Musiala）久傷回歸都仍係處於調整期，未能串聯起哈利卡尼（Harry Kane）與及奧利斯（Michael Olise）嘅前場火力，可見就算得失球差已去到+64咁瘋狂嘅拜仁，短期內都有啲問題同挑戰需要面對。

回顧上半季兩隊交手，主隊拜仁人腳稍欠完整兼有歐聯顧慮就只係小勝2:1，而當日為多蒙特送出全場唯一助攻嘅拉亞臣，嚟緊就不幸剛好儲夠黃牌需要停賽，加上歐聯太早出局打擊士氣、中後場人選又存在不確定性，多蒙特今次如果想要證明自己唔係只靠恰弱隊儲分，難度絕對唔細。

預計兩隊正選陣容：

【多蒙特】
Kobel - Can, Anton, N.Schlotterbeck - Yan Couto, Sabitzer, F.Nmecha, Svensson - Beier, Brandt - Guirassy

【拜仁慕尼黑】
Urbig - Laimer, Upamecano, Tah, Stanisic - Pavlovic, Kimmich - Olise, Gnabry, Luis Diaz - Kane

分類:

足球資訊

01/03/2026 多蒙特 vs 拜仁慕尼黑

分類:

標籤:

關於我們:

快速連結:

聯絡我們: