11/04/2026 多蒙特 vs 利華古遜

足球資訊 | 德國甲組足球聯賽(2025/26) | 發布日期: 10/04/2026

比賽日期	主隊	客隊	主勝機率	和局機率	客勝機率
2026-04-11 21:30	多蒙特	利華古遜	48.9 %	20.3 %	30.8 %

主勝機率	和局機率	客勝機率
48.9%	20.3%	30.8%

排名: 排名: 德甲(2) vs 德甲(6)

直播資訊: Now 639, NowE, beIN Sports

仍然踢緊德國U21嘅前鋒特雷索迪（Nicolo Tresoldi）有德國、阿根廷爭相拉攏做大國腳，去到球會層面，特雷索迪亦都受到多家球會青睞，其中就有傳多蒙特已經有初步接洽，利華古遜亦不甘示弱派人同布魯日方面探路。兩隊爭前鋒隨時激烈過聯賽賽場上嘅對碰，亦都反映咗兩隊各自面對緊類似嘅煩惱。

唔講唔覺，多蒙特自歇冬前贏咗慕遜加柏，就一直佔據德甲阿二位置已有14週，不過大家都可以估到，多蒙特呢個「老二」係近年較弱嘅一位：參考番前四季廿八週過後嘅德甲積分榜，先唔好計2024年利華古遜首嘗冠軍嗰屆嘅拜仁慕尼黑呢個異數（28週80球），大致嚟講每季同一時段聯賽第二位嘅球隊最少已經射入咗62球。去到今季，排第二嘅多蒙特只係射入60球創下近年新低，反而上季亞軍利華古遜同期射入63球，今季成季跌watt跌至第六，但入球數量都只係比蜜蜂兵團少咗兩個咁大把。

利華古遜今季表現始終未能穩定落嚟，要重返前四嘅歐聯區域始終爭咁些少。就以上週主場6:3大破禾夫斯堡呢場為例，雖然30歲前鋒舒希克（Patrik Schick，圖右）終於攻破晒德甲生涯所有25支對手嘅大門，但仍需要接受狀態反覆向下嘅事實，再加上不時俾傷患打亂部署，變成多次傳出想走嘅舒希克企唔穩必然正選位置之餘，喀麥隆19歲中鋒高法尼（Christian Kofane）亦未有亮麗嘅統計數字去「爭寵」（25場入5球）。

而多蒙特亦都要面對類似嘅問題。當攻中白蘭特（Julian Brandt）已公佈下季走人同時間助攻數量下滑，第二年做蜜蜂仔嘅比亞（Maximilian Beier，圖左）個人統計數字只能算係延續上季格局，未能再進一步。如此一來打最前、同樣已踏入30歲嘅中鋒古拉斯（Serhou Guirassy）今季進一步減產（27場德甲入13球場均低於0.5，上季場均則仍達0.7）就變成難以避免。

數到呢度，筆者就覺得多蒙特會方或者教練尼高高華對艾迪耶美（Karim Adeyemi）係欠咗個交代。上一仗作客史特加，當外界一致睇高主隊一線，尼高高華就似乎受到德國隊教練拿高士文嘅言論啟發，選擇主動收縮、消耗史特加前鋒安達夫（Deniz Undav）嘅威脅，去到下半場踢咗一半先嚟換入失寵嘅艾迪耶美，而艾迪耶美亦都不負所託補時打開紀錄，令史特加球員洩晒氣再輸埋第二球俾白蘭特。可惜阿迪耶米喺呢場收下今季第五面黃牌，今仗迎戰利華古遜想將戰術複製重做一次都已經唔可能。

多蒙特進攻再少咗一瓣，又係唔係代表咗利華古遜可以更放心對攻呢？上場移番上前踢中場嘅基馬度（Alejandro Grimaldo）個人獨取兩個入球，但賽後佢都坦白講隊波嘅防守未夠班。畢竟利華已接連俾海登咸同禾夫斯堡兩支護級隊伍射入三球，做開防中嘅隊長安特列治（Robert Andrich）客串後衛變咗長做，但越踢越沉，就算正選門將菲利根（Mark Flekken）復出已踢咗兩場都較難立即根治漏洞。

預計兩隊正選陣容：

【多蒙特】
Kobel - Anton, N.Schlotterbeck, Bensebaini - Ryerson, Bellingham, Svensson - Sabitzer, Brandt - Guirassy, Beier

【利華古遜】
Flekken - Quansah, Andrich, Tapsoba, Grimaldo - Aleix Garcia, Palacios - Culbreath, Tella, Maza - Kofane

分類:

足球資訊

11/04/2026 多蒙特 vs 利華古遜

分類:

標籤:

關於我們:

快速連結:

聯絡我們: