賀芬咸喺上季經歷咗唔少起伏，尤其係防守上面曾經有嚴重問題，教練伊沙11月入隊救亡之後嘅平均得分同前任馬達拉素只好少少，處境極之尷尬，相信冇乜人會估到伊沙守得住個位展開新球季之餘，更要喺首週即刻作客贏埋利華古遜打響頭炮。

上週賽前預報已經有提及賀芬咸季前一系列熱身賽幾位新援都表現對辦，但確係未至於會預佢哋即刻全面進佔主力位置，例如雙中場即時改用艾杜拉華（Leon Avdullahu，巴素利轉會）、禾達貝加（Wouter Burger，史篤城轉會）呢對組合，企後面嘅一pair中堅亦一口氣全換新人，分別係貝拿度費南迪斯（Bernardo，波琴轉會）、町田浩樹（聖基萊斯聯轉會，圖左）。可惜係賀芬咸雖然真係靠改善防守贏到利華，日援町田浩樹卻只係奮戰咗上半場就已要退下火線，更證實係斷十字韌帶一到埗就要長唞。賀芬咸說時遲那時快，即刻喺盧加諾嗰邊傾掂埋瑞士中鋒夏積達里（Albian Hajdari），一切順利嘅話甚至有機會即刻要正選落場應急。

客隊法蘭克福近年憑住出色管理度過一個又一個挑戰，開季睇嚟已消化到前鋒伊基迪基離隊與及門將傷、走所帶來嘅空缺。佢哋亦同樣引入日本新援：踢翼嘅堂安律（圖右）早喺弗賴堡打響名堂，首仗正賽踢起嚟甚至搶鏡過風頭更勁嘅新中鋒貝卡特（Jonathan Burkardt）。堂安律嘅靈活跑位同快速反應令法蘭克福嘅攻擊層次更加多變，並且能夠喺關鍵時刻自己得分，對於後場需要重新磨合嘅賀芬咸嚟講又係一份幾難做嘅功課。伊沙眼見球隊難得成功建立起防守紀律，亦當然希望就算人選一變再變都能一直將呢份team spirit維持落去。

 

預計兩隊正選陣容：

【賀芬咸】
Baumann - Coufal, Arthur Chaves, Hranac, Bernardo - Avdullahu, Tohumcu - Kramaric, Toure - Lemperle, Asllani

【法蘭克福】
Zetterer - Kristensen, Collins, Koch, Theate - Larsson, Chaibi - Doan, Uzun, Bahoya - Burkardt