德甲賽前分析(06/12/2025-08/12/2025)

足球資訊 | 德國甲組足球聯賽(2025/26) | 發布日期: 04/12/2025

06/12/2025 03:30 緬恩斯(德甲18) vs 慕遜加柏(德甲12)

後衛Kohr繼續停賽、攻中Nebel領紅加入停賽名單、門將Zentner繼續傷出，緬恩斯決定唔爭在做埋「震盪治療」：炒埋個教練。

06/12/2025 22:30 史特加(德甲6) vs 拜仁慕尼黑(德甲1)

史特加、拜仁都喺星期三嘅德國盃十六強比賽中出full team，考慮到兩隊下週中都有歐洲賽，需留意今場會唔會出現輪換而導致賽情發展異常。

06/12/2025 22:30 禾夫斯堡(德甲15) vs 柏林聯(德甲11)

柏林聯踢德國盃想複製聯賽守和拜仁嘅賽果，無奈出盡力都要輸2:3，加上副隊長Khedira今場停賽，中場或會受壓。禾夫斯堡本身仍係散散地，但聯賽主場對賽卻擁有驚人嘅五勝一和不敗佳績，加上週中冇踢德國盃，隨時靠今場反底。

06/12/2025 22:30 奧格斯堡(德甲14) vs 利華古遜(德甲4)

奧格斯堡今季新帥Wagner主攻但最終踢出嚟攻不強守不穩，終要孭鑊下台，曾教過奧格斯堡、現時掌管青訓事務嘅Manuel Baum出山頂住先。利華古遜聯賽主場輸俾多蒙特後隨即喺德國盃復仇成功，要留意利華還要準備下週三對紐卡素嘅歐聯主場比賽。

06/12/2025 22:30 海登咸(德甲16) vs 弗賴堡(德甲8)

弗賴堡喺星期三德國盃稍作變陣贏達斯泰特，下週中又要兼顧歐霸盃，上週意外客勝柏林聯嘅海登咸今場或會帶來更大挑戰。

06/12/2025 22:30 科隆(德甲10) vs 聖保利(德甲17)

聖保利德國盃作客贏慕遜加柏爆咗個小冷門，亦令球隊上下暫時忘記德甲嗰邊九連敗嘅沉重壓力、稍為提升番士氣。科隆防守仍係略嫌單薄，進攻方面El Mala仍係球隊焦點所在。

07/12/2025 01:30 RB萊比錫(德甲2) vs 法蘭克福(德甲7)

主客雙方近況都唔係sharp醒。失球偏少嘅RB上週只能賽和慕遜加柏稍為意外，接落嚟要睇前鋒新秀Harder同Nusa嘅發展進度。法蘭克福話就話德甲近六場不敗，實際欠缺火氣，中鋒Burkardt受傷、歐聯主場吞阿特蘭大三蛋嘅陰影仍未消除，而下週中更係要作客回勇嘅巴塞。

07/12/2025 22:30漢堡(德甲13) vs 雲達不來梅(德甲9)

漢堡近一個月先後追平多蒙特、贏埋史特加，無奈一個轉身踢德國盃十六強就俾同區宿敵基爾踢出局，連續兩場北部打比先輸一仗。雲達不來梅則要面對攻力支援不足問題，借將Boniface報到至今體能仍未完全恢復，另一年輕選擇Topp亦係仍未喺德甲開齋。

08/12/2025 00:30 多蒙特(德甲3) vs 賀芬咸(德甲5)

（請留意網站更新）