德甲精選賽前分析(28/02/2026-02/03/2026)

足球資訊 | 德國甲組足球聯賽(2025/26) | 發布日期: 26/02/2026

28/02/2026 03:30 奧格斯堡(德甲10) vs 科隆(德甲12)

主勝: 46.1% 客勝: 28.3%

奧格斯堡主場較有揸拿，已係七場連續不敗最近更接連打贏榜尾球隊取得二連勝。科隆上循環由新星El Mala追成平手，如今El Mala名氣越來越大但仍然未穩坐正選位置，球迷對教練嘅決定感到極為費解，事關上週咪又係靠佢追平賀芬咸。

28/02/2026 22:30 利華古遜(德甲6) vs 緬恩斯(德甲13)

主勝: 69.3% 客勝: 13.5%

上週估中利華古遜分心兩場歐聯附加賽會出事，今期兵源唔夠充足嘅利華明顯改為以歐聯為重，「間場」嘅德甲則可以輪換。唯一失算係附加賽次回合睇住食都要搞到攻中Maza受傷離場。

28/02/2026 22:30 雲達不來梅(德甲17) vs 海登咸(德甲18)

主勝: 36.3% 客勝: 38.9%

雲達不來梅自上輪作客以1:2不敵聖保利後，聯賽已經連續13場未能取勝兼跌到落第17，近兩季主場對海登咸更係從未贏過。海登咸上週趁史特加兵疲搶到重要一分，弗賴堡外借前鋒Dinkci攻入加盟後嘅首個球，有機會為球隊前線注入新動力。

28/02/2026 22:30 慕遜加柏(德甲14) vs 柏林聯(德甲9)

主勝: 45.9% 客勝: 29.7%

柏林聯上仗靠穩健防守，乘利華古遜輪換止住七場不勝頹勢，代價係主力做助攻嘅前鋒Ilic儲夠牌要停賽。慕遜加柏對住柏林聯往績上稍有優勢，今場更有中場Reitz刑滿復出強化中場，喺下週作客拜仁前今場係終結七場不勝嘅重要時機。

28/02/2026 22:30 賀芬咸(德甲3) vs 聖保利(德甲16)

主勝: 60.2% 客勝: 20.4%

賀芬咸定位大抵已確定為爭踢歐聯，當中主力攻擊手Kramaric 已屆34歲但繼續發亮，今季德甲已經貢獻10個入球及4次助攻。聖保利最近主力逐步復出，上輪終於擊敗雲達不來梅，稍為重拾信心。

01/03/2026 22:30 史特加(德甲4) vs 禾夫斯堡(德甲15)

主勝: 61.8% 客勝: 19.7%

禾夫斯堡已係連續六場不勝（二和四負）。史特加上星期四作客蘇格蘭踢歐霸附加賽，打後就出現賽和海登咸嘅異常狀況，今週四史特加帶住4:1踢次回合兼係接連踢主場，有望減低聯賽再次失分嘅機會。

02/03/2026 00:30 法蘭克福(德甲7) vs 弗賴堡(德甲8)

主勝: 56.6% 客勝: 21.1%

法蘭克福上週天殘地缺作客拜仁僅輸2:3落敗，久傷復出嘅中鋒Burkardt即取得入球，對新帶隊嘅教練Riera可能係件好事。弗賴堡今場有中場Manzambi、翼鋒Beste同時停賽，對球隊創造力打擊唔細。

02/03/2026 02:30 漢堡(德甲9) vs RB萊比錫(德甲5)

主勝: 32.7% 客勝: 41.5%

萊比錫上週領先多蒙特兩球都被追平，隊波嘅穩定性再次受到質疑。漢堡今場有中堅Vuskovic刑滿復出，有助穩定防線，但要留意下星期三加插咗一場主場對利華古遜嘅補賽。