德甲賽前分析(18/10/2025-19/10/2025)

足球資訊 | 德國甲組足球聯賽(2025/26) | 發布日期: 17/10/2025

18/10/2025 02:30 柏林聯(德甲13) vs 慕遜加柏(德甲17)

攻中鄭優營轉會柏林聯一直未能入局，令教練Baumgart選人調動受到制肘。士氣低落嘅慕遜加柏終於要換體育總監，喺新官有plan之前看守教練Polanski仍要急需諗出即時提升球隊表現嘅方法。

18/10/2025 21:30 緬恩斯(德甲16) vs 利華古遜(德甲5)

賣走前鋒Burkardt嘅緬恩斯攻力冇咗保證，上場作客俾漢堡炒夠四強都慘唔過德甲主場暫時全輸。

18/10/2025 21:30 RB萊比錫(德甲3) vs 漢堡(德甲9)

萊比錫攻守表現都有所提升，尤其是新加盟翼鋒Bakayoko為球隊帶嚟多個重要進球，已經成為球隊嘅關鍵人物。漢堡則算係及時企穩陣腳，新加盟球員例如翼鋒Philippe、中堅Vuskovic喺攻守上都頗有貢獻。

18/10/2025 21:30 禾夫斯堡(德甲15) vs 史特加(德甲4)

禾夫斯堡係緬恩斯以外嘅另一「主場之鬼」，開季至今主場成績係兩和一負，不論教練以至球員都感到十分失望。史特加雖然失去咗前鋒Demirovic（可能要傷缺長達八個星期），但另一前鋒Undav唞埋國際賽後已經歸隊一齊操練，今場預計將會復出。

18/10/2025 21:30 海登咸(德甲18) vs 雲達不來梅(德甲12)

前面缺人嘅海登咸唯一勝仗就係上一次主場擊敗處於頹勢嘅奧格斯堡，嚟緊就算番到主場，教練Schmidt強調仍係要先求穩守再作其他打算。

18/10/2025 21:30 科隆(德甲6) vs 奧格斯堡(德甲14)

科隆踢踢下已經似中型班多過似升班馬，翼鋒El Mala上仗對賀芬咸再次取得入球，盛傳已進入拜仁嘅雷達範圍，與此同時踢過賀芬咸嘅門將Schwäbe亦有令人放心嘅表現，嚟緊科隆主場優勢預計將可再次發揮關鍵作用。

19/10/2025 21:30 弗賴堡(德甲8) vs 法蘭克福(德甲7)

弗賴堡聯賽、盃賽六場不敗，唔係標青但總算逃離咗開季嘅連敗危機。教練Schuster接落嚟將要解決球隊進攻創造力不足嘅問題。法蘭克福近期失波頻頻，教練Toppmöller已表明唔滿意球隊嘅防守能力。

19/10/2025 23:30 聖保利(德甲10) vs 賀芬咸(德甲11)

聖保利起初賴以翻身嘅進攻外掛開始失效，已錄得三連敗之餘更只係攻入過一球，球隊寄望傷癒復出嘅中堅Mets能夠幫忙穩住後防先再算。