今次RB萊比錫對史特加除咗係德甲第二名對第三名嘅大波，亦將會係一場帶有明顯「復仇」意味嘅大戰：史特加近四場正賽對賽全贏之餘，單計上一季就更先後喺德國盃四強及聯賽收官日痛擊呢隊久病嘅紅牛，直接間接都斷絕晒對方保留歐戰席位嘅最後希望。

萊比錫雖然揭幕戰作客拜仁慘輸0:6，但之後已係踢出一波六勝一和嘅不敗走勢，攻守兩端逐步踢番出以往嘅鋒利度同組織性，上週更喺聯賽以6:0大炒奧格斯堡，隨後又喺星期二作客科特布斯輕取4:1再晉一級。RB萊比錫目前之所以能夠穩住陣腳，除咗我哋較早前介紹過嘅新任隊長大衛拉林（David Raum），就連兩翼巴卡約高（Johan Bakayoko）、迪奧文迪（Yan Diomande）以至中鋒羅梅路（Romulo）呢三位新兵都起到正面作用，當新買球員都逐漸適應、上力，踢得番以往嘅高壓拼搶風格，伏兵中場嘅鮑加特拿（Christoph Baumgartner，圖左）就成為最大得益者，近四場聯賽盃賽射入六球咁多。

史特加方面，佢哋打到上第三名部分原因或許在於賽程上有優勢，而不幸中之大幸則係當首席中鋒迪米諾域（Ermedin Demirovic）受傷要長期缺陣嘅時候，另一前鋒安達夫（Deniz Undav，圖右）就剛好復出填番個中鋒位。就喺史特加最近喺德甲、德國盃接連對緬恩斯嘅兩場波之中，安達夫就分別取得入球同埋助攻，狀態方面不成問題，只係要留意番史特加上星期兩戰緬恩斯係喺星期三場德國盃先嚟出齊主力，相信嚟緊作客萊比錫都需要出動原班人馬先至做到牌面上夠砌，到時一眾球員嘅恢復程度就值得多加留意。

 

預計兩隊正選陣容：

【RB萊比錫】
Gulacsi - Baku, Orban, Lukeba, Raum - Seiwald - Ouedraogo, Baumgartner - Bakayoko, Romulo, Nusa

【史特加】
Nübel - Jeltsch, Zagadou, Chabot - Assignon, Chema, Stiller, Mittelstädt - Bouanani, El Khannouss - Leweling

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。