14/02/2026 法蘭克福 vs 慕遜加柏

足球資訊 | 德國甲組足球聯賽(2025/26) | 發布日期: 13/02/2026

比賽日期	主隊	客隊	主勝機率	和局機率	客勝機率
2026-02-14 22:30	法蘭克福	慕遜加柏	57.3 %	22.2 %	20.5 %

主勝機率	和局機率	客勝機率
57.3%	22.2%	20.5%

排名: 德甲(8) vs 德甲(12)

直播資訊: beIN Sports

今個週末英超讓路俾足總盃，我哋不妨又望番德甲，睇一場雙方排名唔高但應會幾有參考價值嘅賽事。主隊法蘭克福忍痛與甸奴托比慕拿一刀兩斷，從采列請來西班牙教練利亞拿止血。上星期利亞拿首場帶隊，作客柏林聯只能踢成1:1執番一分勉強合格，今個禮拜六番到主場迎戰近況回軟嘅慕遜加柏，取勝與否或會成為評估法蘭克福能否短期內番身嘅指標。

事情要講番去首循環階段嘅第5週，法蘭克福作客慕遜加柏上演入球show，總入球數字去到雙位數認真誇張。當時法蘭克福新開季仍只係二勝二負，未至於可以斷定佢哋喺防守上出現嚴重問題，但呢場波竟然可以係上半場連轟五球下半場俾慕遜加柏追番四球，為法蘭克福嘅惡夢埋下伏筆。

法蘭克福頭半季嘅防守俾人感覺都係組織鬆散。中堅羅賓確克（Robin Koch）擔當防線樞紐，身為隊長嘅佢身先士卒做足本分，但係兩閘唔多生性，俾到對手唔少空間執番個波再造組織。法蘭克福單計一月份五場聯賽，就算甸奴托比慕拿已經被炒由看守教練頂替都係場場失三球，呢個紀錄絕對羞家。新教練利亞拿執教之後採取較穩健嘅改造策略，睇嚟會係將重心放更多喺突尼西亞防中沙希利（Ellyes Skhiri）身上，由佢主導前場壓迫與及協調後衛防線。稍為唔好彩係沙希利上週剛好儲夠五張黃牌停賽，法蘭克福作客柏林聯只能賽和未竟全功，只能實現到減少失球呢個已經好卑微嘅願望，比賽末段更有中場奧斯卡海倫兩黃一紅被逐。今場對慕遜加柏法蘭克福牌面稍高，理應會更能睇到利亞拿點樣實踐自己嗰一套打法。

話說回來，喺嗰場6:4入球show上演之際，慕遜加柏其實係已經換過一次教練，呢位由II隊抽調暫代、直至坐正簽到長約嘅波蘭斯基只係開心咗一陣子，慕遜加柏如今排名已從榜尾爬番上去第十二，但自去年十一月享受過一輪正賽四連勝之後就再冇乜佳作，近五場更係只取得三平兩負。如今首席中鋒基蘭迪安斯復出冇耐即刻再傷要做手術、右翼賀路域（Franck Honorat）復出以嚟亦係無甚建樹，全隊身價最高嗰位中場韋斯（Rocco Reitz）則已成為拜仁、萊比錫嘅爭奪對象，新任體育總監初到時口口聲聲冬窗主動出擊買人，結果只係借咗幾個球員都算，實情係就連新借番嚟嘅球員都冇乜得點落場，大概可以估到呢刻嘅波蘭斯基係幾咁無奈，只能盡做。

若果計對賽往績，法蘭克福無疑係佔盡先機，佢哋近九次對慕遜加柏踢出五勝四和、保持不敗，而近五次主場比賽亦取得二勝三和，計落慕遜加柏即係自2020年以嚟就未喺法蘭克福主場贏過波。不過仍需要留意法蘭克福人選仍有變數，攻中主將奧遜（Can Uzun）受傷已缺席兩場、主力後衛菲亞迪（Arthur Theate）則喺隊中練習受傷，傷勢似乎唔輕，至於原定今場有得復出嘅中鋒貝卡特（Jonathan Burkardt）咁橋病咗，訓練改為單獨進行，冬窗從諾定咸森林借嚟、踢六場只入咗兩球嘅卡利梅安度（Arnaud Kalimuendo）大有機會要繼續撐場。（慕遜加柏今場亦有主力中堅奇雲迪斯Kevin Diks停賽）

預計兩隊正選陣容：

【法蘭克福】

Kaua Santos - Kristensen, Koch, Amenda, Brown - Skhiri - Doan, Götze, Larsson, Chaibi - Kalimuendo

【慕遜加柏】

Nicolas - Sander, Elvedi, Chiarodia - Engelhardt - Castrop, Ullrich - Reitz, Stöger - Honorat, Tabakovic

分類:

足球資訊

14/02/2026 法蘭克福 vs 慕遜加柏

分類:

標籤:

關於我們:

快速連結:

聯絡我們: