14/12/2025 弗賴堡 vs 多蒙特

足球資訊 | 德國甲組足球聯賽(2025/26) | 發布日期: 13/12/2025

比賽日期	主隊	客隊	主勝機率	和局機率	客勝機率
2025-12-14 22:30	弗賴堡	多蒙特	36.8 %	24.6 %	38.6 %

主勝機率	和局機率	客勝機率
36.8%	24.6%	38.6%

排名: 德甲(9) vs 德甲(3)

直播資訊: Now 639, NowE, beIN Sports

話說現時已係36歲嘅萊斯上季已經改玩MLS投靠洛杉磯銀河，星期三番咗嚟探班兼睇蜜蜂兵團對波杜基林特嘅歐聯主場賽事。萊斯同另一位「多仔」傳奇球員哥斯基奧斯認真唔話得，佢哋直情企番入看台球迷區同一眾die hard fans一齊吶喊助威。點知教練尼高高華似乎安心得滯用咗套輪換陣容嚟迎接呢隊挪超球隊，就咁燒焦俾對手追平2:2認真掃興，本來大有機會直接晉身十六強嘅形勢一下子又變得緊張起嚟。

「多仔」上下都知今次瀨瀨哋嘢。尼高高華已好客氣只係話球隊深度尚待提升，中堅兼副隊長舒洛達碧克（Nico Schlotterbeck）賽後就乜面都唔俾，冇開名噴咗句：「既然第60分鐘先至上場，就唔該你谷盡餘下呢30分鐘」，都咪話唔爆。多蒙特踢到第67分鐘一口氣換入咗兩進攻球員，一個係今季移入攻中位嘅艾迪耶美（Karim Adeyemi），另一位則係中鋒古拉斯（Serhou Guirassy）。舒洛達碧克係鬧緊一個人定兩個人大家不得而知，但係德國嗰邊已經預期星期日作客弗賴堡嘅賽事中，至少古拉斯會失去正選位置俾今季新加盟嘅法比奧施華（Fabio Silva）。

除咗進攻球員唔俾力之外，今場作客弗賴堡更大缺口可能喺後防嗰邊。事關星期三呢場歐聯一次過整傷咗兩個中堅安頓與及安瑟米路，中場硬漢沙比薩（Marcel Sabitzer）亦只能再等進一步觀察，多蒙特13場聯賽只失11球嘅表現將會受到挑戰。佢哋唯一要幸慶係今場嘅對手係弗賴堡：弗賴堡單計主場對多蒙特已係近三場全敗，計晒主客場更係輸足七場，期間每場都起碼失三球，就算單從舒洛達碧克倒戈起計，佢都已經贏足五場，呢方面弗賴堡未開波都可以話係怯晒。

今季弗賴堡再冇埋進攻泉源堂安律與及後防老大古特，開季至今都係跌跌撞撞，下下都要原班人馬出戰歐霸先維持到現時仍有機會直接晉級十六強嘅希望。而代價就係德甲成績飄忽不定，例如上週就竟然輸俾海登咸十分冇面，教練祖利安蘇斯達賽後就承認今期德甲、德國盃、歐霸三線作戰導致體能消耗過大，例如今季從邦比加盟嘅日本攻中鈴木唯人，佢喺再次前三場聯賽射入兩球兼有一個助攻十分強勢，去到海登咸客場就只能先列後備埋下輸波伏線。而奧地利中堅連赫特（Philipp Lienhart）對海登咸踢咗半場就已係體力不繼被教練換走，去到歐霸主場對薩爾斯堡雖然取得入球但最終因傷提早退下火線，可謂多災多難。如今弗賴堡23日內跑七場嘅消耗戰嚟到尾聲，一眾主力應已經十分渴望踢埋今年餘下兩場聯賽、快啲過聖誕。

預計兩隊正選陣容：

【弗賴堡】
Atubolu - Kübler, Ginter, Lienhart, Treu - M.Eggestein, Osterhage - Beste, Manzambi, Scherhant - Höler

【多蒙特】
Kobel - Can, N.Schlotterbeck, Bensebaini - Yan Couto, Sabitzer, F. Nmecha, Svensson - Adeyemi, Chukwuemeka - Fabio Silva

分類:

足球資訊

14/12/2025 弗賴堡 vs 多蒙特

分類:

標籤:

關於我們:

快速連結:

聯絡我們: