22/02/2026 RB萊比錫 vs 多蒙特

足球資訊 | 德國甲組足球聯賽(2025/26) | 發布日期: 19/02/2026

比賽日期	主隊	客隊	主勝機率	和局機率	客勝機率
2026-02-22 01:30	RB萊比錫	多蒙特	39.1 %	19.3 %	41.6 %

主勝機率	和局機率	客勝機率
39.1%	19.3%	41.6%

排名: 德甲(5) vs 德甲(2)

直播資訊: Now 639, NowE, beIN Sports

星期六晚德甲將上演一場勢均力敵嘅賽事。多蒙特本賽季雖然長期留守第二位，聯賽方面更已係六連勝，今場作客RB萊比錫將會係一場重要試煉。「多仔」經常可以全取三分，表面看來實力強勁，但其實內部有不少隱憂，只係好多時靠個別球員發威，令一啲臨場只係踢出五五波嘅形勢分得出勝負，其中不得不提右路嘅拉亞臣（Julian Ryerson）。拉亞臣未至於下下踢足全場，但自歇冬完後幾乎每場都交出助攻，上星期多蒙特大炒緬恩斯四球，竟然四球助攻都係由拉亞臣包辦，都咪話唔得人驚。

而去到星期三嘅歐聯十六強附加賽首回合，拉亞臣面對阿特蘭大繼續派貨交出一個助攻，協助主隊多蒙特淨袋兩球打下基礎，但老土講句針冇兩頭利，拉亞臣五日內兩場已踢足180分鐘，假如今場作客教練尼高高華打算輪換留力，多蒙特假如欠缺呢位三線合共已有11個助攻嘅助攻王，不論對火力唔穩定嘅最前線以至近期極為缺人嘅後防線都會係好大損失。

主隊RB萊比錫則冇咁好彩，佢哋嘅狀態飄忽不定已反映晒喺積分表上，德國盃八強俾拜仁慕尼黑淘汰都算，就算係單計歇冬期後嘅七場德甲，萊比錫都只能踢出三勝兩和兩負，接連喺緬恩斯、禾夫斯堡兩支護級球隊身上失分認真失威。萊比錫今季攻力稍欠火候，尤其今季從燕豪芬加盟嘅右翼巴卡約高（Johan Bakayoko）表現飄忽甚至傷出，令左翼就算入啱貨羅致到迪奧文迪（Yan Diomande）都顯得左右失衡令對手較易防守。

因此萊比錫極之重視從白禮頓借番嚟嘅古達（Brajan Gruda）。呢位喺緬恩斯打響名堂嘅右翼轉投英超白禮頓後冇乜表現機會，如今白禮頓決定問多蒙特買番防中柏斯高哥斯，同時放古達回歸德甲，古達一番嚟就已經進佔主力位置，上場對禾夫斯堡更係兩個入球都關佢事，佔計就算巴卡約高已經復出，古達嘅正選位置都未會咁快放番出嚟。

如無意外，萊比錫應會睇中多蒙特有歐聯附加賽次回合嘅顧慮，借主場之利發動猛攻旨在重振聲威。雖然萊比錫一號門將古拿斯作客禾堡期間傷出，預料成個三月都唔會再出得番嚟，但大家可以留意番RB一早已經有意俾二號門將雲迪禾特（Maarten Vandevoordt）下季擔正，後者今季繼續有為德國盃比賽把關，相信交接方面唔會有太大問題，反觀多蒙特顧慮會更多，假如舒洛達碧克（Nico Schlotterbeck）仍未去番100%，相信都唔會即刻放佢落場搏殺。

預計兩隊正選陣容：

【RB萊比錫】
Vandevoordt - Baku, Orban, Lukeba, Raum - Seiwald - Gruda, Baumgartner - Diomande, Romulo, Nusa

【多蒙特】
Kobel - Reggiani, Anton, Bensebaini - Yan Couto, Sabitzer, F.Nmecha, Svensson - Adeyemi, Chukwuemeka - Guirassy

分類:

足球資訊

22/02/2026 RB萊比錫 vs 多蒙特

分類:

標籤:

關於我們:

快速連結:

聯絡我們: