德甲精選賽前分析(21/03/2026-23/03/2026)

足球資訊 | 德國甲組足球聯賽(2025/26) | 發布日期: 19/03/2026

21/03/2026 03:30 RB萊比錫(德甲5) vs 賀芬咸(德甲3)

主勝: 50.8% 客勝:32.4%

RB萊比錫首循環已領教過今季蛻變後嘅賀芬咸有幾堅（作客輸1:3），主場近四場全勝嘅往績將會受到挑戰。RB上週直撼史特加輸咗場「六分波」頗傷士氣，稍為利好係賀芬咸近況回軟，上週主場僅能與禾夫斯堡踢成1:1平手。

21/03/2026 22:30 拜仁慕尼黑(德甲1) vs 柏林聯(德甲9)

主勝: 85.1% 客勝: 5.1%

拜仁二號龍Urbig排除萬難喺星期三歐聯次回合復出，同場亦見Kane返回正選位置，番到聯賽後人手缺口將只剩低停賽嘅Tah、Diaz及Jackson需要處理。客隊柏林聯上週克服中後場大規模傷停作客擊敗弗賴堡，可惜係二號門將Raab勇戰受傷首戰即成收咧戰，今場將要啟用三號門將Klaus，此外中場Schäfer仍繼續要停賽。

21/03/2026 22:30 禾夫斯堡(德甲17) vs 雲達不來梅(德甲15)

主勝: 48.0% 客勝: 28.6%

雙方德甲對賽往績同為22勝11和22負，總得失球98:98當真打和Super。老牌救火教練Hecking接過禾堡火棒，首要任務係幫球員解壓，上場作客賽和賀芬咸算係好開始，但中期問題則係隊長Arnold近況低迷甚至唔多落到場，呢個位就比較頭痕。雲達嘅復蘇之路喺上週一次主場失利遭到重擊（0:2負緬恩斯），今場更有中場主力Stage停賽。

21/03/2026 22:30 海登咸(德甲18) vs 利華古遜(德甲6)

主勝: 9.2% 客勝: 75.8%

兵源緊絀嘅利華古遜上月輸俾柏林聯後德甲只係贏過漢堡（一勝三和），上週無法趁拜仁慕尼黑打少兩個全取三分，球隊上下都對未能重返歐聯區極之失望，隨後歐聯作客阿仙奴亦一如所料輸波出局。今場再有後防主力Tapsoba停賽，只能寄望雙方班底差距足以安然渡過呢個失落時期。

21/03/2026 22:30 科隆(德甲14) vs 慕遜加柏(德甲12)

主勝: 47.8 客勝: 26.8%

今場將會係雙方喺德甲進行嘅第100次萊茵打比。勢危嘅科隆教練Kwasniok理應今場要全取三分先保得住帥位，但上週僅和漢堡後口多恭維多咗對手兩句即再惹麻煩。慕遜加柏上週贏聖保利，護級壓力已大大減輕，接落嚟主要任務係挽救持續不振嘅進攻效率，與及為中場Reitz季尾離隊留下的空洞制訂plan B。

22/03/2026 01:30 多蒙特(德甲2) vs 漢堡(德甲11)

主勝: 70.7% 客勝: 13.1%

多蒙特已陸續公佈多位球員提前續約或季後離隊嘅消息，預示下季將展開大換血之餘，亦可以預期好似18歲中堅Reggiani呢類新人喺餘下賽事將會獲得更多機會。漢堡方面，阿根廷中場Capaldo則好有機會今場傷癒復出，有望即時改善到防守嘅硬淨程度。

22/03/2026 22:30 緬恩斯(德甲13) vs 法蘭克福(德甲7)

主勝: 53.6% 客勝: 24.1%

稍為喘定嘅法蘭克福已將目標重新訂為爭歐霸席位，今場挑戰在於隊長Koch領紅停賽，而主隊緬恩斯換帥後面對強隊亦偶有斬獲，Fischer自接以嚟已先後摸和拜仁、利華、史特加，更試過客勝萊比錫，只係星期四需兼顧歐協聯十六強次回合或會有較大消耗。

23/03/2026 00:30 聖保利(德甲16) vs 弗賴堡(德甲8)

主勝: 35.6% 客勝: 34.5%

聖保利好壞消息交集：上場輸慕遜加柏而前鋒Hountondji同場復出，佢今季只入過四球但已經係隊中其中一位神射手，而同一時間主力防中Sands重傷收咧或會成為關鍵事件。弗賴堡位處中游但近況只屬一般，今場前後都要分心歐霸十六強對亨克嘅交鋒，而上週德甲亦因而意外主場輸俾柏林聯，主場連續16場正賽不敗紀錄就此斷纜。

23/03/2026 02:30 奧格斯堡(德甲10) vs 史特加(德甲4)

主勝: 31.8% 客勝: 43.0%

奧格斯堡近六次對戰史特加全敗，而對上兩次主場更都係僅輸0:1，心理壓力唔細。史特加上週終擺脫歐賽前後例牌失分嘅魔咒，主場贏RB萊比錫鞏固第四位，過埋星期四嘅歐霸十六強次回合後會否導致大幅度輪換值得注意。

分類:

足球資訊

德甲精選賽前分析(21/03/2026-23/03/2026)

分類:

標籤:

關於我們:

快速連結:

聯絡我們: