都已經嚟到三月中，阿仙奴仍有機會衝擊四冠，都咪話唔勁，佢哋一個月前係試過足總盃前後嘅聯賽接連失分俾賓福特、狼隊，不過當再睇埋之前、之後都已係連贏四場正賽，間中出現和局當係調節都無可厚非。

當歐聯進入十六強淘汰賽階段，列強加強防守當堂令六支英超代表中伏，首回合完後就只得阿仙奴及紐卡素保到不敗。本來阿仙奴今季最引以為傲嘅定位球戰術，嚟到十六強首回合竟然俾主隊利華古遜以彼之道還施彼身，由左中場好波之人基莫度（Alejandro Grimaldo，圖右）開角球俾串演後衛嘅隊長安特列治（Robert Andrich）伏兵門前先開紀錄，就此打破阿仙奴歐聯連續822分鐘冇落後過嘅紀錄。戲劇化嘅結局係阿仙奴獲得一個具爭議性嘅十二碼，由利華出身嘅夏維斯（Kai Havertz，圖左）主射追平1:1。而去到兩回合之間嘅英超聯賽，對手愛華頓係有俾到壓力之餘，亦對阿仙奴今季出晒名嘅死球戰術有所防備，但正所謂行運一條龍，阿迪達留力歐聯次回合，換走中場蘇比文迪（Martín Zubimendi）卻造就16歲小將杜文（Max Dowman）刷新英超最年輕入球者紀錄，阿記今次完勝2:0既保留到實力亦提升到士氣。

首回合不甘被追平嘅利華古遜就冇咁好彩。陣容本已係殘殘哋嘅利華兩回合之間安排咗打拜仁都算，更尷尬係開賽前已領先第二位多蒙特達11分嘅拜仁陣容不整再加上場內先後有兩人被逐，或多或少激起利華想拎齊三分衝上積分榜第四嘅意欲，但突然想變爭勝客觀結果係球員有額外消耗，常用副選泰利亞（Martin Terrier）受傷退場、後備放落場嘅新貴馬薩（Ibrahim Maza）又搏盡咗一大段，最終利華打多兩件都只能踢成1:1平手，都咪話唔傷。呢方面阿仙奴牌面又贏一次，佢哋呢刻除咗馬連奴提前收咧以外就只係有聯賽傷出嘅右閘尤利安添巴（Jurrien Timber）稍為有啲危，首回合有傷避戰嘅左翼杜沙特（Leandro Trossard）、攻中奧迪哥特（Martin Odegaard）則仍然有機會復出候命。

心水清嘅球迷大概會記得，去年11月利華古遜曾經作客英國，更係爆大冷贏曼城2:0，但唔好忽略當時哥迪奧拿又係玩嘢排出怪陣玩出事，加上利華當時仍由擁有英超經驗嘅菲利根把守最後一關，如今菲利根已經因傷缺陣近兩個月，坐正嘅巴拉斯域治（Janis Blaswich）連二號門將都算唔上，當面對主場擁有布卡約沙卡（Bukayo Saka）、基奧基尼斯（Viktor Gyokeres）、馬度基（Noni Madueke）以至艾斯（Eberechi Eze）多位當fit嘅攻擊好手，利華古遜就算有主將基莫度聯賽停賽避開咗拜仁，都難以斷言就此有足夠本錢喺英國地頭再創奇跡。

預計兩隊正選陣容：

【阿仙奴】
Raya - Mosquera, Saliba, Gabriel, Calafiori - Rice, Zubimendi - Madueke, Eze, Gabriel Martinelli - Havertz

【利華古遜】
Blaswich - Quansah, Andrich, Tapsoba, Grimaldo - Palacios, Aleix Garcia - Poku, Maza - Terrier, Kofane

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。