今季歐聯分組賽將出現一場焦點對戰，由德甲榜首拜仁慕尼黑主場迎戰世冠盃冠軍車路士。講到車路士，最新花生話題已經由佢哋贏晒歐協聯同世冠盃，轉移到一系列嘅違規行為，更有趣係一切竟然係源自「車仔」自動投案：話說BlueCo財團三年前傾緊接收車路士時，已經大概知道前任老闆油王艾巴莫域主政期間，有多宗轉會出現違規情況，例如出動唔合資格嘅人做中介、秘密付款俾中介，又或者出現第三方擁有權違規等嘅情況，犯規夾埋有成74項咁多，當中更涉及昔日伊度奧、夏沙特等嘅名將。BlueCo財團今次係主望動向英國足總披露，無非都係希望從輕發落。

車仔未來一兩季會唔會聯賽扣分，或再嚟一次轉會禁令都未係可知，而BlueCo本身喺接盤前已經撥備咗成億英鎊準備受罰。但唔知係唔係受到消息所影響，上星期作客賓福特就只能打和2比2，總算保得住開季不敗。同日反觀對手拜仁慕尼黑呢，則喺德甲主場大勝久別重逢嘅漢堡5:0，漢堡呢位老對手簡直就係幫拜仁保留體力。

拜仁教練甘賓尼手上呢隊拜仁前線已充滿英超氣息。繼哈利卡尼（Harry Kane）已喺拜仁安家落戶、開季前又有路易斯迪亞斯（Luis Diaz）加盟，轉會窗關閉前更係從車路士借用前鋒尼高拉積遜（Nicolas Jackson），有望填補梅斯亞拉長唞嘅空缺之餘，更為前線帶嚟更多選擇同可能性。車路士就算陣容年年係咁轉，尼高拉積遜都總算踢過兩季，拜仁陣前多咗呢個線眼，主場出擊自然更有信心。

車仔今期氣勢或者係有啲回落，但今場作客亦唔係完全冇機。畢竟拜仁烏柏美卡奴（Dayot Upamecano）、莊拿芬達（Jonathan Tah）呢個中堅組合始終未俾到人好大信心，加上中後場通天老倌拉菲爾古里路對漢堡時受傷，今場未能候命，國際賽檔期後復出即刻有波入嘅攻中彭馬（Cole Palmer）如果狀態趕及進一步提升，將會係拜仁後防嘅心腹大患。

 

預計兩隊正選陣容：

【拜仁慕尼黑】
Neuer - Laimer, Upamecano, Tah, Stanisic - Kimmich, Goretzka - Olise, Gnabry, Luis Diaz - Kane

【車路士】
Sanchez - James, T. Chalobah, Adarabioyo, Cucurella - M. Caicedo, E. Fernandez - Pedro Neto, Andrey Santos, Gittens - Joao Pedro

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。