皇家馬德里對祖雲達斯將喺歐聯上演褪色大戰，皇馬今季暫時表現未算係歐洲最強，弊在祖雲達斯近況更加令人擔心。兩隊七月喺世冠盃十六強已經交手，當時皇馬1:0淘汰祖記，展現出關鍵時刻嘅大賽經驗同臨場應變力。反觀「斑馬兵團」面對頂級對手時經常顯得力有不逮，無論攻防都俾唔到太多信心。

今次要作客班拿貝球場，祖雲達斯都咪話唔嚴陣以待。上週日作客面對有意大展拳腳嘅科木，都決定要做大幅輪換，結果反而踢到亂晒龍最終輸足0:2，錄得今季正賽首場敗仗。實情祖記再之前五場正賽和足五場，當中包括咗頭兩場歐聯分組賽，里爾新加盟前鋒約拿芬大衛（Jonathan David）自聯賽首輪有入球後就無以為繼，另一來自RB萊比錫嘅借將奧賓達（Loïs Openda）更係未能開齋，而上季主力射手拉賀域（Dusan Vlahovic）則因為季初嗌走換嚟長期坐冷板，球隊進攻上明顯仍未搵到最佳方程式。祖雲達斯今季已經係意甲、歐聯六場不勝，聯賽排名更已跌到落第七，內部壓力唔細，教練杜陀嘅帥位唔洗人講都會估係唔穩陣。

至於皇家馬德里，雖然沙比阿朗素接手至今已冇開頭鋒頭咁勁，喺西甲亦拋唔甩巴塞隆拿，但總算keep得住個爭標步伐。上場西甲聯賽作客對基達菲，沙比冒險起用剛傷癒復出的麥巴比（Kylian Mbappé），俾麥巴比80分鐘一箭定江山，再一次成為救世主。麥巴比近八場波都有入球，單計歐聯更係兩場已入五球（首場對法甲當頭起嘅馬賽都能梅開二度），佢同土耳其翼鋒古拿（Arda Güler）之間嘅配合亦越見純熟。加上後防有33歲門將古圖爾斯（Thibaut Courtois）稍有復蘇跡象，整體表現比祖雲達斯穩定得多，祖記防線要面對皇馬強大嘅主場火力，太近期有對賽過就更係已俾對手熟習咗打法，可以預期會踢得非常吃力。

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。