新一季歐聯將喺香港時間星期三掀起戰幔，聯賽階段首日比賽就有皇家馬德里主場迎戰重返歐聯嘅法甲代表馬賽。

馬賽上季喺法甲表現突出，成功以亞軍身份重返歐洲冠軍聯賽，今季誓要喺歐洲賽場一展拳腳，而兩季缺席歐聯兼未能經歷改新制嘅第一季，將會係佢哋嘅劣勢，所以夏天買人都見馬賽有花過心思。例如外流一季就已經回歸嘅36歲中鋒奧巴美揚（Pierre-Emerick Aubameyang），呢位加蓬射手雖然年紀已大，但話晒具備咗豐富嘅歐戰經驗。此外，馬賽更成功喺國際米蘭借用到後衛柏華特（Benjamin Pavard），呢位2018年世界盃冠軍成員，剛剛加盟就已經迅速適應，而上季喺里爾有踢過歐聯嘅中場安祖高美斯（Angel Gomes）嚟到馬賽亦有當年喺曼聯一齊出道、早喺前年已轉戰法甲嘅翼鋒格連活（Mason Greenwood，圖右）照應，就算馬賽較早前狠心落手趕走咗打交嘅拉比奧特與及莊拿芬路，缺口亦應該已經填番好有餘。

喺上星期五嘅法甲賽事，馬賽教練迪些比就已經開始玩輪換兼試用三後衛陣式，輕鬆擊敗下游嘅羅連安特。至於佢哋今場對手皇家馬德里，雖然上星期六喺西甲作客皇家蘇斯達時少踢一人，但仍頂得住贏2:1，展現出一定嘅韌力同戰鬥力，為新教練沙比阿朗素keep住聯賽四連勝嘅佳績。呢場波皇馬前鋒麥巴比（Kylian Mbappé，圖左）狀態火熱，做晒入球同助攻，而隱憂則會喺防守嗰邊。佢哋本來已經失去咗要唞兩三個月嘅中堅魯迪加（Antonio Rüdiger），新加盟嘅侯辛（Dean Huijsen）雖然後生又有潛力，但對皇蘇場西甲就係佢踢得半個鐘已經領紅，先令到場波局面變得緊張，嚟緊歐聯對馬賽如無意外都會繼續係由佢拍住艾達米列圖（Eder Militao），到時務必要保持冷靜同專注，避免類似情況再次發生。

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。