2025年夏季轉會窗，歐洲男足市場出現咗一個好明顯嘅資金同人才流動趨勢，形成咗一個以英超為核心、德甲同法甲互相依存嘅循環結構。根據FIFA剛發表嘅最新報告，全球職業男足嘅轉會宗數達到近12,000宗，總轉會費用突破咗97億美元，較去年同期大幅增加超過50%。其中英超就以大約32億美元嘅轉會開支位列歐洲之冠，明顯拋離德甲同意甲。

要講英超呢場軍備競賽不得不提利物浦，佢哋喺夏窗關閉前以創紀錄嘅1.25億英鎊從紐卡素簽入瑞典前鋒伊薩（Alexander Isak，圖左二），結束咗一段拖拉幾個月兼且充滿爭議嘅轉會過程。但早喺伊薩克之前，利物浦就已經為德國中場穫斯（Florian Wirtz）、法國前鋒伊基迪基（Hugo Ekitiké）每人燒多近1億鎊，再加上費林邦（Jeremie Frimpong）等多位重量級新援，全部轉會開支高達4億英鎊，刷新咗俱樂部同英超轉會紀錄。

利物浦下下重鎚，迅速喺英超引發出連鎖反應：較早前仍係喺轉會市場屢傳失利嘅紐卡素為咗準備伊薩離隊，動用近9,000萬歐羅簽入史特加前鋒禾達美迪（Nick Woltemade，圖右二），再用5,500萬英鎊從賓福特引入韋沙（Yoane Wissa），韋沙仲一度公開要求賓福特好心放人。而另一位早成為紅軍「獵物」嘅水晶宮隊長馬克古希（Marc Guehi）就冇咁好彩，因為水晶宮喺deadline前未能搵到合適接替人選，球會最終決定死攬唔放，馬克古希就喺Here we go都出埋嘅情況下仍結果未能如願加盟利物浦。

一系列事件亦反映出中下游球隊喺平衡財力同維持戰鬥力之間嘅苦苦掙扎。例如利物浦可以用分期付款、同時高價出售陣中球員等策略靈活應對財政公平（FFP）規則，令佢哋得以同一時間實現多宗重磅收購。而另一方面，阿士東維拉等球隊卻需要因應英超內部嘅盈利與可持續發展規則（PSR），不得不出售重要隊員以令帳目平衡，從維拉開季嘅慘況睇嚟確係深受其害，亦難怪維拉後衛干沙（Ezri Konsa）直言球隊今個轉會窗係俾英超呢一系列規矩害死。

英超搶人才嘅影響力又點會只限於國內呢？就例如德甲方面，英超前列嘅強大財力今期就令到多位德甲嘅關鍵球員流向英格蘭，情況可以話係前所未見，就算係德甲霸主拜仁慕尼黑，佢哋長期追求穫斯撲個空原來都未算最瘀，今期佢哋出到6000萬歐羅求購禾達美迪，史特加都夠膽死守目標價絕不退讓，最終等到紐卡素出手掃貨。灰頭土臉嘅拜仁幾經波折最終只能喺deadline前捱貴租、從車路士借嚟前鋒尼高拉積遜（Nicolas Jackson），更要附帶5600萬歐羅嘅強制買斷條款，成單嘢顯示拜仁出到去歐洲市場就已係冇乜牙力，一再孭鑊嘅拜仁體育總監艾巴爾亦因此傳出地位不穩。法蘭克福賬面上以高價賣出伊基迪基，但扣除經理人抽佣、母會分成已經跌咗三分一，所以只能喺番德甲引入前鋒貝卡特（Jonathan Burkardt）、堂安律作為現成嘅補充。史特加只用一季時間將免費簽入嘅禾達美迪變成金蛋，但隨咗從法甲尼斯引入翼鋒新星巴布阿蘭尼（Badredine Bouanani）以外就冇乜大動作……今期所見德甲前列彷彿就做咗英超嘅人才儲備庫，至於中型班例如失去咗堂安律嘅弗賴堡，則只能同史特加一樣，效法法蘭克福放眼法國聯賽：法乙特魯瓦前鋒伊列（Cyriaque Irie）標價850萬歐羅依家聽落已經唔係錢嚟，但對於交易雙方嚟講呢單都已經係大deal。

位處「食物鍊」再落一層嘅法國各級聯賽，佢哋持續鞏固作為歐洲青訓基地嘅地位，其中法甲就更開始反過來吸引到英格蘭嘅青年球員前來，佢哋避開咗英超呢個競爭只會越來越激烈嘅自家賽場，爭取更多落場時間期待終有出頭嘅一日。例如翼鋒格連活（Mason Greenwood，上季從曼聯轉會馬賽）、中堅伊根萊利（CJ Egan-Riley，今季由般尼過檔馬賽）、另一中堅基斯維爾（Charlie Cresswell，上季從列斯聯轉到圖盧茲）、防中泰勒摩頓（Tyler Morton，今季從利物浦轉會里昂）等一眾英格蘭球員，都選擇去法甲發展，藉此取得更多上陣經驗，為將來重返英超或者轉戰其他大聯賽打好基礎。法甲嘅大球會例如馬賽、里昂會積極吸納呢啲青年才俊之餘，史特拉斯堡同英超車路士就更加係under同一家BlueCo財團，所以可以預期里昂將當家前鋒卓基（Rayan Cherki）賣俾曼城呢類個案將陸續有來。