利物浦一眾球員人在香港，正積極備戰星期六晚對AC米蘭嘅友賽。喺英國方面球會上下並冇放慢手腳，繼喺利華古遜打包荷蘭翼衛費林邦（Jeremie Frimpong）及德國超新星穫斯（Florian Wirtz）、從般尼茅夫購入匈牙利左閘卡卡斯（Milos Kerkez）之後，嚟緊盛傳將會再出現巨deal，今次目標將係德甲法蘭克福嘅法國前鋒伊基迪基（Hugo Ekitike），德國嗰邊講法係交易金額將接近9500萬歐元天價（約6900萬鎊）。伊基迪基本人傾向加盟利物浦，而喺祖達（Diogo Jota）剛剛不幸離世嘅呢個時刻，利物浦除咗有補強鋒線嘅急切實際需要，引入新人亦希望可以改變一吓近期愁雲慘霧嘅氣氛。

利物浦今夏引援兵分多路，除咗伊基迪基之外，紅軍亦曾積極要斟上季踢到識飛嘅紐卡素前鋒伊薩（Alexander Isak），不過紐卡素既然企硬唔賣，亦促使利記直奔伊基迪基，加快同法蘭克福嗰邊嘅談判進程。引述未經證實嘅小道消息，伊基迪基將與利記簽約去到2031，年薪約為1500萬歐元，人工一口氣加咗五倍。

至於英國方面嘅料，則話利物浦主帥史諾今次亦都好似之前搶穫斯咁親自做聯絡落足咀頭，以視像會議形式向伊基迪基講好晒嚟緊想點用佢，呢招對伊基迪基同樣湊效，將車路士、紐卡素一眾追求者拋諸腦後。

身高接近1米9嘅伊基迪基年僅23歲，計埋PSG外借嘅半季都只係喺法蘭克福僅僅踢咗年半，上季季中就已經要繼承馬莫殊（Omar Marmoush）離隊帶嚟嘅進攻責任，最終為法蘭克福喺各條戰射合共射入22球並貢獻12次助攻，成為德甲最受矚目嘅新晉前鋒之一。尚未代表法國大國腳出賽嘅伊基迪基主要喺禁區搵食，單箭頭、雙前鋒打法都適應到，但馬莫殊仍喺法蘭克福嘅時候佢哋兩個係能夠互換位置迷惑對手，加上伊基迪基style本身就識得主動參與高位壓迫兼肯回防，難怪各界都存有厚望，希望單deal一傾得成即可配合到利物浦嘅打法發揮作用。

講到呢度不得不提法蘭克福今次又財源滾滾。回顧佢哋近兩三年嘅大deal，先假設伊基迪基成事，佢加埋馬莫殊（年初8千萬歐羅賣去曼城）、高路梅安尼（前年9500萬歐羅賣俾），三個球員夾埋帶來2億7千萬歐羅，但大家又未必知，法蘭克福當初買呢三個人只係洗咗唔夠2千萬歐羅，馬莫殊、高路梅安尼當年都係免費轉會（!），認真大癲。當中值得留意嘅係法蘭克福自4年前體育總監Markus Krösche從RB萊比錫過檔到來後持續喺法國聯賽深耕細作，善用當地良好青訓帶嚟嘅好處招攬到唔少速度、技術、對抗都有優勢嘅新秀，喺高路梅安尼、伊基迪基以外，法蘭克福陣中亦先後引入中鋒華希（Elye Wahi）、左翼快馬巴奧耶（Jean-Mattéo Bahoya）、中場伊班（Junior Dina Ebimbe）等幾位法國兵，再主打快速同時重視高強度攻守轉換嘅踢法，開正呢瓣嘅法國兵如魚得水快速成長，身價亦自然水漲船高，加上法蘭克福早已睇準今夏世冠盃咁大個彩池勢必托高個市，今期只要唔急於求售，就更容易賣到個達標嘅超靚價。

喺落筆呢一刻，名記者Fabrizio Romano講到好實伊基迪基已到咗利物浦做埋體測，相信就快會公佈好消息，日前更有傳伊基迪基一搞掂轉會就會即飛嚟香港同大隊會合，如果係堅香港球迷本週追星睇波又可以再多一個矚目焦點。（圖片：網上改圖）