拜仁慕尼黑喺歐聯憑住凶猛火力兩回合雙殺皇家馬德里殺入四強，番到德甲再靠對史特加呢場南北打比確認衛冕德甲，去到今個星期三再淘汰埋利華古遜，自2020年後重返德國盃決賽。拜仁主帥甘賓尼貫徹「無情足球」哲學，就算場波打和就夠數佢都仍選擇全力進攻，展現出恐佈嘅統治力：如今聯賽仲有四週先至完結，拜仁累積入球就已經打破1971/72紀錄去到109球，平均每場入球達3.6個，單計得失球差嘅+80，都已經幾肯定會高過晒其餘17隊今季嘅入球數量（暫排第二嘅史特加只入到62球）。但如果以為拜仁屈機只因為德甲其餘17隊太弱，咁就要睇埋歐聯嗰邊係12場11勝入38球（僅輸過一場俾阿仙奴）、場均入球都接近3.2個。甘賓尼呢套粗中帶細嘅「有前冇後」打法能夠喺拜仁落戶，無疑係今季歐洲球壇其中一個最值得觀察嘅現象。

甘賓尼上個賽季嚟到拜仁，深受外界質疑：除咗認為係杜曹離場、拜仁高層搵唔到大牌教練頂替之餘，更大個問號係當時甘賓尼份CV裡面最響亮嘅一項，就只係帶領般尼踢咗一整季英超（2023/24）兼要做埋升降機。而熟知甘賓尼風格嘅朋友更可以即時指出：甘賓尼個打法好鍾意全隊壓前。甘賓尼第一季初嚟報到都尚叫做「入鄉隨俗」，穩穩陣陣袋咗個德甲冠軍過咗試用期先。只係勢估唔到進入第二季，甘賓尼始終對自己嗰套念念不忘，而且大家經過近兩年磨合後越踢越有，成為歐洲球壇不能夠忽視嘅新風潮。

甘賓尼呢套戰術理念，以接近玩命嘅方式壓前，不斷走位為對手製造出防守錯位以創造缺口。喺場上辨識度最高嘅執行者莫過於經常會墮後key ball嘅中鋒哈利卡尼（Harry Kane）。卡尼上季初到貴境「只係」喺德甲射入26球，如今已經32歲嘅佢跑動範圍大咗入球數字不減反增，聯賽暫時落場27次射入32球，個人入球數字暫時比第16位嘅聖保利全隊夾埋更要多，更恐佈係去到歐聯Harry Kane都keep到平均每場入多過一球（11場入12球），除咗自己入禁區接應，又要不時墮後中場帶波組織、將對方後衛拉到去錯晒嘅位造就隊友乘虛而入，一聽就知係粗重工作，但卡尼就係做得到還要做得好，唔洗講都知係甘賓尼嘅福將。

甘賓尼呢套全力擾敵嘅打法仲有另一個特點，就係會喺壓上時叫兩閘收入中路（inverted full-backs），呢種打法會為前面兩翼提供攻大嘅拉邊進攻空間。需知道今季拜仁正選兩翼就係同哈利卡尼一樣迎嚟第二季大爆發嘅奧利斯（Michael Olise，暫時全季正賽18個入球29次助攻）與及今季一到埗就發光發亮嘅迪亞斯（Luis Díaz，暫時全季正賽25個入球20次助攻）。當兩個經常憑住個人能力同狀態拉開兩邊，攻中梅斯亞拉（Jamal Musiala）季前參加世冠盃重傷長期缺陣帶嚟嘅缺口就剛好攤薄咗。呢種打法喺後場亦都順便舒緩咗左閘快馬艾方素戴維斯（Alphonso Davies）傷多過踢嘅問題：當兩閘角色唔再係疊瓦出波，對球員嘅速度要求相對冇咁高，陣中現成嘅拉馬（Konrad Laimer，本身打開中場中）、史坦尼錫（Josip Stanisic）就更能揚長避短，入到中路可以連繫番甘美治（Joshua Kimmich）與及柏夫洛域（Aleksandar Pavlovic）合作做小組滲透，失波時又可以幫手先做第一輪攔截。

講到呢度，大家當然識得講「有得必有失」喎，中路俾你截到晒但兩閘空虛咪又係俾對方兩翼有更多機會反撲？於是甘賓尼會同你講佢原來不求clean sheet、最重要係將進攻火力最大化，只要前面入球有保證，間中失波就唔係大問題，唔信可以問下德甲嘅多蒙特（聯賽兩回合共輸3:5）、RB萊比錫（聯賽兩回合共輸1:11）、史特加（聯賽兩回合連同季前超級盃三場合共輸3:11），以至歐聯嗰邊嘅皇馬（八強兩回合共輸4:6）同埋阿特蘭大（十六強兩回合共輸2:10），隊隊都有血有淚。

拜仁今季暫時踢咗48場正賽，當中只有14場clean sheet，少於上季同期嘅20場，但當發現勝仗數量卻係41:32，相信大家已經明白晒係咩回事。於是歐聯八強大家會見到就算對手同樣係做高位壓迫嘅皇家馬德里，拜仁作客都會選擇鬥攻，而當皇馬發現拜仁踏入40歲兼傷患纏身嘅門神紐亞（Manuel Neuer）都上埋身，都只能望門興歎。

拜仁現時已經德甲冠軍到手，德國盃剛剛又殺入決賽，如果主力陣容保持完整（基拿比提前收咧係有啲可惜），配合甘賓尼今期「無情足球」嘅銳氣，加上歐聯對手仍未有太多機會實際體驗呢種瘋狂打法，拜仁實在係有本錢繼2020年COVID賽季後再一次染指歐洲盟主寶座，兼再一次締造三冠王佳績。