06/07/2025 巴黎聖日耳門 vs 拜仁慕尼黑

足球資訊 | 世冠盃 | 發布日期: 02/07/2025

排名: 法甲(1) vs 德甲(1)

直播資訊: DAZN

巴黎聖日耳門同拜仁慕尼黑係今屆世冠盃嘅兩大熱門，如今兩隊提前喺八強直撼，臨場嘅天氣或會再一次左右大局。

今屆世冠盃賽事已經多次遭遇受惡劣天氣影響，唔係遇上酷熱就係暴雨閃電搞到要賽事暫停，基本上中途放water break已係預咗，咁嘅氣候對歐洲各大球會隊員嚟講尤其唔易適應。拜仁老將湯馬士梅拿（Thomas Müller）呢個時候就老大哥上身，講到明冇得怨天怨地，只能靠自己適應同調整。

喺分組賽階段我哋已經提及過，呢位36歲都嚟緊嘅「梅拿仔」今次美國出trip還有另一個目的係去FC洛杉磯探路，但一直未有傳來好消息，據講都係錢作怪（隨著FC洛杉磯出局後法國前鋒基奧特已經離隊，加上傳出adidas會出手「疏通」，呢單deal應該仍有得斟）。結果拖到呢一刻已踏入七月合約期滿，拜仁方面話晒廿幾年感情，就同梅拿續多咗一個月約，等佢可以完成整個世冠盃賽程完美道別。所以大家會見到拜仁十六強淘汰法林明高之後只係同利萊辛尼farewell，轉頭就隨即宣佈辛尼件10號波衫將會由復出以來暫時只能「就住用」嘅梅斯亞拉（Jamal Musiala）所繼承。梅斯亞拉、梅拿各有不同原因而未能全勤、提前報到嘅比索科（Tom Bischof）都只係分組賽初試咗45分鐘，入球重責好自然又落喺分組賽入三球嘅法國翼鋒奧利斯（Michael Olise）與上場梅開二度嘅中鋒哈利卡尼（Harry Kane）身上。

巴黎聖日耳門方面則延續歐聯決賽以嚟嘅亢奮狀態，世冠四場就只係意外輸俾保地花高一場，四場共入咗十球波。當中鋒迪比利（Ousmane Dembele）狀態遲遲未能恢復而錯過成個分組賽，PSG仍有呢個好成績不得不佩服全隊嘅部署同紀律，尤其係中後場，防中祖奧尼維斯（Joao Neves）、右閘夏基美（Achraf Hakimi）做到關鍵串聯角色之餘更已係每人獨取兩個入球，多點進攻足以令拜仁防不勝防。PSG喺十六強四蛋餽贈國際邁亞密，迪比利亦終於可以落場踢半個鐘，嚟緊佢嘅恢復進度將足以影響比賽走向。另一方面，拜仁分組賽尾場意外1:0輸畀賓菲加，雖則避到即撼車路士不過下線整體挑戰較大，如今對著PSG已經要當決賽咁踢。

兩邊同樣期待康復當中嘅皇牌趕及以最佳狀態落場搏盡，但大家亦要留意呢場八強大戰開波時間正值當地中午，雙方就算full team出戰都有機會受到時嘅天氣影響臨場發揮。

分類:

足球資訊

06/07/2025 巴黎聖日耳門 vs 拜仁慕尼黑

分類:

標籤:

關於我們:

快速連結:

聯絡我們: