喺剛過去嘅2024/25球季，巴黎聖日耳門（PSG）同馬德里體育會（馬體會）先至第一次喺歐聯碰頭，半年過後就已經喺擴充版2025年世冠盃分組賽再次交手，合演世冠盃分組賽首場重頭戲。

應屆「四冠王」PSG以強勢姿態摘下歐聯冠軍，狂喜過後多位主力球員即刻投入喺德國舉行嘅歐國聯四強賽，雖然今年風頭躉前鋒迪比利（Ousmane Dembélé）、巴高拿（Bradley Barcola）踢完頭場就因傷退出法國隊，但及後已經冇咩大礙，葡萄牙後衛紐奴文迪斯（Nuno Mendes）更喺決賽大放異彩。教練安歷基今季成功將隊伍凝聚成一支真正嘅團隊，今次出戰世冠盃關鍵在於保持全隊繼續處於良好嘅競爭狀態。

今季同樣逐漸上力嘅馬德里體育會，最終喺西甲以第三名衝線，擅守嘅馬體會今季屢為強隊製造麻煩，當中更當然包括歐聯分組賽階段以2比1擊敗仲喺重組摸索期嘅PSG。今季從曼城轉投嘅阿根廷中鋒艾華利斯即射入29球，即成為馬體會攻擊線嘅核心，今次喺美洲地頭出戰應會獲得唔少現場觀眾支持。