世冠盃賽前分析(15/06/2025-16/06/2025)
足球資訊 | 世冠盃 | 發布日期: 14/06/2025
直播資訊: DAZN
擴充版世冠盃揭幕戰將會喺香港時間6月15日（星期日）朝早8點踢早場，由東道主美國嘅代表之一、上屆MLS冠軍邁阿密國際迎戰上屆世冠盃季軍、非洲班霸艾阿里。
15/06/2025 08:00 A組 艾阿里(埃超聯2) vs 國際邁阿密 (美職東岸3)
非洲冠軍聯賽前五屆贏咗四次嘅艾阿里今季喺四強不敵F組嘅馬姆洛迪辛當斯衛冕失敗，而喺自己地頭嘅埃及超聯則達成三連霸，居中串連前後嘅Ashour值得留意。由球王Messi及「前巴塞集團」領軍嘅邁阿密國際頭尾兩場分組賽都留喺市內作賽（非自己主場），作為上屆美職聯冠軍嘅佢哋暫居東岸第三，失球卻同時打入東岸「前六」。36歲前西班牙國家隊左閘Alba新近受傷，今場未必上陣。
16/06/2025 00:00 C組 拜仁慕尼黑(德甲1) vs 奧克蘭 (新西蘭北聯3)
奧克蘭喺大洋洲就無敵，一入到世冠盃則係近五年首圈出局，今季更面對球員過檔同市但打澳職嘅奧克蘭FC、餘下班底極為欠缺國際賽經驗等問題，就連喺自己地頭嘅新西蘭北部聯賽領先地位都開始保唔住。奧克蘭今屆首仗即要面對有意爭標嘅拜仁慕尼黑，就算拜仁大幅度輪換都仍係一大挑戰。
16/06/2025 03:00 B組 巴黎聖日耳門(法甲1) vs 馬德里體育會(西甲3)
16/06/2025 06:00 A組 彭美拉斯(巴甲4) vs 波圖(葡超3)
彭美拉斯自教練Abel Ferreira 2020年執教以來已贏咗10個大賽錦標，當中包括巴甲與南美自由盃各兩次，其中18歲前鋒Estevao身價估值已達6000萬歐羅，大賽完後更會加盟車路士，將會成為各界焦點。波圖今季諸事不順，除連續兩季聯賽屈居第三之外，下放歐霸亦係早早出局，極需要重新振作，攻中Mora係球迷嘅希望所在。
16/06/2025 10:00 B組 保地花高(巴甲8) vs 西雅圖海灣者(美職西岸6)
西雅圖海灣者喺2022年贏得中北美洲及加勒比海聯賽冠軍盃（CONCACAF Champions Cup），因此成為首支出線世冠盃嘅美國球隊，更成為分組賽32隊之中唯一享有真主場之利嘅球隊，曾代表斯洛伐克踢過38場嘅攻中Rusnak係全隊取分之匙。2021年一度跌落巴西乙組嘅保地花高上季重奪巴甲冠軍兼夾贏埋南美自由盃，今季聯賽表現稍為回落，而前鋒Igor Jesus則已被諾定咸森林book定咗。