世冠盃不論係贊助定係轉播，都會見到唔少沙特阿拉伯資金嘅影子。而作為整個大賽中唯一嘅沙特職業聯賽代表、獲沙特主權基金直接泵水嘅希拉爾，近年不論係本土聯賽、盃賽，以至亞冠都進一入咗不大不小嘅「低潮」（沙特聯賽輸俾伊蒂哈德、亞冠精英賽四強不敵同屬沙職聯嘅吉達艾阿里），單計嚟緊8月移師香港踢嘅沙超盃四強，希拉爾亦可算係星味較弱嘅一隊。希拉爾上季重點收購就只得葡萄牙後衛簡些路（Joao Cancelo），今次踢世冠佢哋都唔係冇嘗試補強，但先後傳出斟C朗、B費等大牌球星都係無疾而終，反而成功從E組國際米蘭嗰邊撬到應屆歐聯亞軍教練施蒙尼恩沙基。施蒙尼恩沙基喺世冠期間需要繼續依賴原有班底：隊長左翼阿杜沙利（Salem Al-Dawsari）踢到33歲仍然保持到高效輸出，過去一季正賽造出26個入球18個助攻、聯賽主要由塞爾維亞前鋒米祖域（Aleksandar Mitrovic）攻城掠地，盃賽方面則較多用從賓菲加購入嘅巴西青年軍馬高斯李安納度（Marcos Leonardo），後者初嚟報到已有好表現。簡些路早前仍然有傷未能入選歐國聯四強階段嘅葡萄牙大軍，最新線報顯示佢將可趕及今場復出大戰皇家馬德里。

皇馬喺過去一季本土聯賽同歐洲賽事成績同樣欠說服力，僅喺上半季贏得歐洲超級盃與及FIFA首辦嘅洲際盃，已贏盡各大錦標嘅名帥安察洛堤亦只能黯然提前離場，改教巴西嘗試新路徑。如今皇馬喺利華古遜請得名宿沙比阿朗素回巢，面對呢支今季失去中場運球大師卻奧斯、另一中場大師摩迪（Luka Modric）亦已進入倒數模式嘅皇馬，外界普遍認為沙比將會引入佢慣用嘅3-4-3陣式，但咁樣無疑係對今季長期欠缺阿拉巴（David Alaba）、卡華積（Daniel Carvajal）嘅皇馬後防帶來更大挑戰，呢樣係新加盟嘅英超雙雄阿歷山大阿奴（Trent Alexander-Arnold）、侯辛（Dean Huijsen）都未必能即時解決嘅問題，此外前已迷惘咗一整季嘅麥巴比（Kylian Mbappe）、比寧咸（Jude Bellingham）進攻配置問題，亦好大機會隨著沙比引入3-4-3而回到起點從頭上路。

回顧呢兩隊歐、亞霸主雙方唯一正式交鋒，就係前年嘅世冠盃決賽，當時皇家馬德里以5:3擊敗希拉爾。如今皇馬換帥換血，整體實力雖然仍會高出希拉爾一線，但沙比阿朗素初來報到估計部署仍會穩陣為上。