祖雲達斯同曼城即將喺世界冠軍球會盃正面交鋒，呢場可以話係今屆嘅焦點賽事之一。兩隊喺早前嘅分組賽中表現出色，都能輕取對手，分組賽最後一場對決前，雙方早已篤定晉級。喺G組，兩隊得失球差相同，祖雲達斯多入曼城一球，暫時企喺小組首名。由於G組次名下一輪將面對H組首名(好大機會係皇家馬德里)，為避免下回合要踢硬仗，呢場雙方必定傾盡全力希望贏波。

祖雲達斯喺G組第二場4:1大勝摩洛哥嘅韋達卡薩白蘭卡。被認為係「新迪比亞路」嘅十號仔尤迪斯(Kenan Yildiz) 光芒四射，射入兩球之餘，亦令對手擺老烏，連同首場嘅入球，世冠盃兩場已有3球進帳。祖雲達斯喺小組首場5:0大勝阿聯酋對手艾阿恩，兩個外借嘅球員表現出色:由波圖外借嘅的干斯卡奧(Francisco Conceicao)同PSG借將高路姆亞尼(Randal Kolo Muani)各梅開二度，都希望繼續藉場上表現令自己來季繼續留隊。

曼城亦以全勝姿態晉級，首場憑科頓(Phil Foden)一射一傳，造就球隊2:0贏韋達卡薩白蘭卡，第二場哥迪奧拿黎個大輪換，由19歲阿根廷小將艾切維利(Claudio Echeverri)擔正，佢禁區外射入一記美斯式罰球，成為呢場最矚目嘅球員。根度簡(İlkay Gündoğan)梅開二度，最後由卓基(Rayan Cherki)埋單，射入佢加盟曼城嘅首個入球，狂數對手艾阿思6:0。域高路易斯(Rico Lewis)首場紅牌被逐，國際足協判為嚴重犯規，停賽三場，將錯過對祖雲達斯嘅賽事。

預計比賽中曼城會積極掌控節奏，儘量利用中前場嘅攻力同創造力，祖雲達斯則會鞏固防線，打快速反擊，兩邊主力球員嘅發揮將直接影響賽果。