世冠盃賽前分析(05/07/2025-06/07/2025)

足球資訊 | 世冠盃 | 發布日期: 03/07/2025

直播資訊: DAZN

05/07/2025 03:00 富明尼斯(巴甲6) vs 希拉爾(沙職聯2)

國米、曼城雙雙墮馬，令呢場八強組合完全出乎意料之外。今場兩隊門神都會成為焦點，富明尼斯門將Fabio擋得住國米排山倒海嘅反擊，希拉爾嗰邊更為神奇，門將Bono硬頂曼城百二分鐘30次射門僅失三球之餘，巴西U21前鋒Leonardo更係梅開二度省靚招牌。

05/07/2025 09:00 彭美拉斯(巴甲4) vs 車路士(英超4)

彭美拉斯十六強面對巴甲近年對賽毫無優勢嘅保地花高要踢到加時，隊長中堅G.Gomez兩黃一紅將係今場硬碰車路士嘅一大缺口，反而賽前焦點、呢一刻已過檔車仔因而冇得再出賽嘅18歲翼鋒Estevao未有斬獲，彭美拉斯嚟緊冇佢未必係重大損失。

06/07/2025 04:00 皇家馬德里(西甲2) vs 多蒙特(德甲4)

八強尾場上演前屆歐聯決賽戲碼翻版。多蒙特險勝蒙特雷中場掩護實在不足，導致後防經常受壓造就門將Kobel係咁表演。皇馬前鋒Mbappe上場對祖雲達斯復出踢咗廿分鐘，今場要睇會唔會正選上陣兼踢番三前鋒，暫時只能肯定Bellingham兄弟對碰未會上演住（多蒙特Jobe Bellingham停賽）。

世冠盃話咁快迎接八強大戰，隨著多支歐洲豪門殺入八強，嚟緊將已會有熟識嘅強強對碰出現，例如賽前兩支熱門PSG、拜仁過咗星期五就只能兩隊活一隊。另一方面歐聯亞軍國際米蘭與哥氏曼城雙雙提前出局，則令八強意外地出現咗一場非歐洲代表對碰嘅賽事，大家將可以繼續欣賞南美足球富明尼斯與及之後會訪港嘅希拉爾。