法林明高同車路士分別係南美同歐洲嘅一線球隊，世冠盃一齊獲編入D組。香港時間星期六03:00兩隊將要碰頭，可稱得上係今屆世冠杯分組最有話題嘅賽事之一。

車路士首場分組賽被安排喺足球一直冇生根嘅阿特蘭大踢下晝3點場，二萬人次入場喺香港可能已係超好入座率，但喺一場容量可以去到七萬嘅國際賽事就會變成「醜聞」。事實上車仔喺呢場2:0擊敗FC洛杉磯嘅比賽中展現咗一定競爭力，前鋒尼高拉積遜（Nicolas Jackson）繼續憑速度同力量成為車仔進攻嘅關鍵人物之外，喺葉士域洛過檔嘅另一前鋒戴納（Liam Delap）則係後備上陣交出助攻，經由中場安素費蘭迪斯（Enzo Fernandez）射入第二球順利勝出。2024/25球季「下放」歐協聯而又贏到冠軍嘅車路士繼續招兵買馬暫時所見算係對辦，車迷就算仍需要等待A組彭美拉斯嘅艾斯迪禾（世冠盃後先至過嚟），都可以先暫時鬆一口氣。

再睇法林明高，呢支南美豪門喺首次分組賽對陣非洲代表艾斯柏蘭斯，以2:0輕鬆取勝。烏拉圭中場迪阿拉斯卡達（Giorgian de Arrascaeta）先開紀錄，32歲嘅佢係球隊核心，出任攻中今季已為法林明高取得第13個入球。而第二球則由阿仙奴新轉會嘅中場佐真奴（Jorginho）送出助攻，可謂轉會轉得合時。雖說艾斯柏蘭斯睇嚟係有啲失色令法林明高打得易咗，但都總算有個好開始，加上較多用喺盃賽嘅厄瓜多爾翼鋒干沙路柏拉達（Gonzalo Plata）整個五月缺陣以嚟首次復出踢到25分鐘，令防守持續穩健嘅法林明高嚟緊喺進攻上又多番個選擇。