星期六早上嘅世冠賽程唔單止有法林明高對車仔呢場重要戲碼，尾場（香港時間早上9點開波）嘅拜仁對小保加亦預期會係激戰一場。

小保加喺上一場分組賽對賓菲加卡踢得轟烈，一度領先兩球但最終被追平2:2，過程中仲出現咗三張紅牌，小保加呢邊就獨得兩張，嚟緊中堅Nicolas Figal與及前曼聯中場、冬窗加盟嘅安達靴里拉都可以休息，頓時令球隊中後場穿窿，嚟緊對拜仁慕尼黑無可避免要做大幅度人員調整。有趣嘅係，拜仁體育董事Max Eberl喺賽前就已經預言小保加對賓菲加注定激烈火爆，事實上小保加近年表現稍欠霸氣，但佢哋極希望透過今屆世冠盃呢個國際大舞台重振球隊聲威，踢得專注同搏命係意料之內。

拜仁首場世冠盃分組賽10:0輾壓只屬於半職業level嘅奧克蘭，參考價值唔算好高，較值得留意係梅斯亞拉（Jamal Musiala）長唞過後傷癒復出，僅踢30分鐘即耍出帽子戲法，為拜仁嘅進攻重新注入強勁動力。後防方面新收購嘅中堅莊拿芬達（Jonathan Tah）搭配一條平時都甚少見嘅後防線組合未受考驗，至於進攻，中鋒哈利卡尼（Harry Kane）受制於對家全力縮後嘅企位較難發揮，反而造就三位正選攻中京士利高文（Kingsley Coman）、湯馬士梅拿（Thomas Müller）、奧利斯（Michael Olise）各入兩球人人happy。其中肯定離隊嘅35歲老將梅拿早被包裝為拜仁最後探戈成為賽前焦點，本來都預咗教練甘賓尼會俾佢更多發揮機會，而最近更傳出梅拿會趁今趟美國之旅順度考察D組嘅FC洛杉磯，各方面都顯示呢位隊中開心果以至全隊上下都有頗強嘅爭勝同表現意欲。甘賓尼教拜仁過咗一季，只能得德甲一個冠軍，對於呢隊傳統豪門嚟講其實並唔合格，加上世冠盃獎金又咁和味，喺目前隊內良好氣氛配合之下，拜仁可以話係繼巴黎聖日耳門之外嘅另一爭標熱門。

小保加出戰世冠前已係好一段時間冇咗38歲隊長前鋒卡雲尼助戰，陣容深度亦難與拜仁匹敵，但賽前只得1分嘅小保加要省招牌就唔會留待最尾一場靠恰奧克蘭咁小學雞，而拜仁為今次世冠盃可以出到幾多功力，亦將可以通過呢場歐洲南美大戰睇出端倪，所以話今場應會幾有睇頭。