今季英超雀神當道，繼利物浦贏英超，紐卡素奪聯賽盃、水晶宮攞足總盃之後，就連同樣會喺會徽上「露鳥」嘅熱刺都攞埋歐霸盃冠軍，果真係「鳥隊」氣勢如虹。就連西甲貝迪斯嘅官方social media不甘後人，都整咗個惡搞版「鳥化」會徽，希望沾下旺氣。畢竟借將安東尼（Antony）單季分別代表曼聯、貝迪斯贏兩個錦標嘅美夢喺第一關就已經斷纜，想補強番個氣勢都好合理。

貝迪斯由已經71歲、曾經執教過皇馬、曼城等多隊勁旅嘅名帥柏歷堅尼領軍，今季歐協聯四強淘汰前兩屆決賽台柱費倫天拿，首度打入國外盃賽決賽，過程並不容易。冬窗引入嘅翼鋒安東尼自加盟以來，喺25場波內錄得9個入球5次助攻，其中喺四強更係主客各入費倫天拿一球，係貝迪斯晉級決賽嘅一大功臣。今季貝迪斯成為唔少球員重生嘅敗部復活福地，除咗安東尼，仲有皇馬舊部但一度有半年冇班落嘅33歲西班牙攻中伊斯高（Isco）擔任隊長、伊斯高唔喺位時隊長臂章就會交俾曾效力多蒙特嘅34歲中堅巴查（Marc Bartra），較為可惜係另一年過三十嘅中堅、同樣係今季加盟嘅迪亞高洛蘭迪自四月中就已經因傷提前收咧。

聯賽方面，早已鎖定第六名西甲（即係下季歐霸資格已經在手）嘅貝迪斯因為聯賽煞科戰安排喺星期五踢，因此仍可以派出大量主力同華倫西亞踢成1:1和氣收場兼保持狀態。反觀對手車路士，佢哋上季聯賽失手無奈下放歐協聯，面對繁重嘅本土賽程之餘還要應付幾乎跑勻全歐洲嘅歐協聯客場賽事，嚟到英超煞科日更係要踢星期日兼硬撼同樣要爭歐聯位嘅諾定咸森林，教練馬利斯卡就自然火都嚟埋，話晒貝迪斯比車路士抖多咗足足兩日。今季東奔西跑嘅賽程一度令車路士表現跌watt，儘管嚟到季尾有所恢復但行程緊湊係不爭嘅事實，亦令馬利斯卡有可能要保留更多歐協聯常用班底做正選。暫時已知歐協聯「專用龍門」佐真臣（Filip Jorgensen）憑出色表現已獲馬利斯卡確認今場繼續正選，此外喺英超領紅近兩場聯賽都有得休息嘅主力中鋒尼高拉積遜（Nicolas Jackson）取代歐賽主力但受傷嘅尼干古亦冇乜懸念，其餘位置則仍有一定變數。呢一刻嘅「藍戰士」係以英超第四身分出戰決賽，不論結果係點下季佢哋都會係重返歐聯，而馬利斯卡更希望嘅係用今場決賽幫自己以至今季所起用嘅一班新仔掙番啲認可同尊重。

 

預計兩隊正選陣容：

【貝迪斯】
Fran Vieites - Aitor Ruibal, Natan, Bartra, R.Rodriguez - Johnny, Pablo Fornals - Antony, Isco, Abde - Bakambu

【車路士】
Jörgensen - James, Adarabioyo, Badiashile, Cucurella - Caicedo, Dewsbury-Hall - Madueke, Palmer, Sancho - Jackson