25/05/2025 諾定咸森林 vs 車路士

足球資訊 | 英格蘭超級足球聯賽(2024/25) | 發布日期: 24/05/2025

比賽日期	主隊	客隊	主勝機率	和局機率	客勝機率
2025-05-25 23:00	諾定咸森林	車路士	29.7 %	36.3 %	34.0 %

主勝機率	和局機率	客勝機率
29.7%	36.3%	34.0%

排名: 英超(7) vs 英超(5)

今季英格蘭球壇，出現「雀鳥之年」呢個異數，近年雄霸球壇嘅曼城，將錦標悉數讓俾會徽有隻雀嘅球隊，自己就要喺煞科日爭取歐聯一席，排十七嘅熱刺反而已經上咗岸。第三至七要鬥到最後一個回合，可見今季英超係幾咁引人入勝。煞科日嘅焦點係排第七嘅諾定咸森林惡鬥第五嘅車路士。車路士如果全失3分，就隨時跌落第六或者第七，最壞嘅情況係要靠下星期贏歐協聯，先至由歐協聯升上歐霸席位。車路士領先1分有主導權，只要贏波就能夠以比維拉較佳嘅得失球差重返歐聯。森林目前已經鎖定咗自1995以來嘅歐洲賽一席，要踢歐聯，除咗呢場自己爭氣攞晒3分，仲要睇紐卡素同維拉嘅賽果。

車路士喺聯賽嘅最終命運，亦緊扣爭緊第八嘅白禮頓同賓福特。如果車路士排名第七又贏歐協聯冠軍，來季就將會以歐協聯盟主身份踢歐霸，聯賽第八位就會踢歐協聯。聯賽踢到最後一輪，前半版仍然競爭激烈。

季初冇乜人會估到森林會由上年嘅降班分子，搖身一變成為前五球隊。由12月底到4月初，森林憑超強韌力，聯賽一直守住第三，到季尾要同列強爭位就無以為繼，近七場聯賽只係贏咗兩場，失分太多令領先優勢大大縮減，而家只係排第七。相反對手車路士過去幾個月表現唔穩定，到季尾就見到終點就來勢洶洶，近八場聯賽只係輸過一場，就算殺到入決賽，車路士今季嘅最大目標始終唔係歐協聯隻盃，而係重返歐聯戰場。

首循環車路士主場賽和森林1:1，次回合要作客並唔容易，森林主場強勢，今季只係失咗15球。對手作客勢弱，近十場作客只係贏過一場，主場球迷嘅吶喊助威，亦令車路士難以控制比賽節奏。前鋒尼高拉積遜(Nicolas Jackson)仍然停賽，今季喺佢缺陣時，面對防守性強嘅球隊都係冇乜板斧。森林嘅球員身體對抗性強，防守有紀律，擅長快速反擊，對車路士嘅搓傳踢法亦造成威脅。

話咁快就去到季尾，現時聯賽榜嘅排名已經充分反映球隊喺呢季嘅表現。第三至七呢幾隊今季實力接近，要踢到最後一場先決定攞邊張歐洲賽入場券。喺歐聯關鍵之戰，森林要慎防近況較佳嘅車路士反客為主。

分類:

足球資訊

25/05/2025 諾定咸森林 vs 車路士

分類:

標籤:

關於我們:

快速連結:

聯絡我們: