英超賽前分析(17/05/2025-21/05/2025)

足球資訊 | 英格蘭超級足球聯賽(2024/25) | 發布日期: 16/05/2025

17/05/2025 02:30 阿士東維拉(英超6) vs 熱刺(英超17)

維拉上場臨尾十分鐘十人應戰（翼鋒Ramsey今場停賽），最終都係靠當家前鋒Watkins上半場嘅入場贏般尼茅夫。維拉已追至同車路士同分，重燃起爭打歐聯嘅鬥志。

17/05/2025 03:15 車路士(英超5) vs 曼聯(英超16)

論近況，車路士本應好過曼聯一截，好衰唔衰前鋒Jackson上場作客紐卡素領紅，輸波後同後面嘅維拉、森林只有一分差距，攻中Palmer將要孭更重飛。

18/05/2025 19:00 愛華頓(英超13) vs 修咸頓(英超20)

修咸頓上週唔理食相死守棄攻，但又真係俾佢哋和到曼城兼避免追平英超單季最低績分紀錄。看守教練Rusk嚟緊大有機會食過番尋味繼續死守，試圖爭多一分得一分。

18/05/2025 21:15 韋斯咸(英超15) vs 諾定咸森林(英超7)

森林嚟到緊要關頭先嚟腳軟踢出三場不勝（二和一負），上場尷尬地俾李斯特城追平2:2跌落聯賽榜第七，就連班主都忍唔住衝落場教訓教練。冇壓力嘅韋斯咸上週作客淨勝曼聯兩球，隊長Bowen近六場入四球，今場足以令有求於人嘅森林頭痕。

18/05/2025 22:00 賓福特(英超8) vs 富咸(英超11)

賓福特喺翼鋒Schade及門將Flekken加持之下越戰越勇，錄得四連勝後已上到第八，嚟緊「保八」已成唯一任務。已經連續16場英超冇和過波嘅富咸留守第11名，「衝八」已不太可能，更傳出教練Silva收到沙特希拉爾急call完季即過去帶隊打世冠盃。

18/05/2025 22:00 李斯特城(英超19) vs 葉士域治(英超18)

兩支降班球隊對碰只為啖氣。水鬥水得嚟主隊李斯特城近況較佳（一勝一和），上場爆大冷追平森林亦提升到士氣。

20/05/2025 03:00 白禮頓(英超9) vs 利物浦(英超1)

白禮頓上場作客贏近況唔錯嘅狼隊同第八嘅賓福特同分，34歲中鋒Welbeck今季入到第10球波超越自己個舊英超紀錄，但比賽末段又出現近期常見嘅大冧檔，教練Hürzeler形容隊波當時已失去控制。

21/05/2025 03:00 水晶宮(英超12) vs 狼隊(英超14)

歐霸冠軍教頭Glasner為水晶宮喺星期六贏得創會百二年以嚟首個國內頂級錦標，同時錄得聯賽、盃賽連續六場不敗，但喺決賽大戰曼城期間隊長Guehi踢到60分鐘已經因傷退下火線，狀況有待觀察。

21/05/2025 03:00 曼城(英超4) vs 般尼茅夫(英超10)

雖然場上係有啲特殊因素作怪，但曼城始終已係接連聯賽、盃賽決賽未能取得入球，復出嘅射手Haaland呢兩場踢足180分鐘仍未著番射門鞋。