04/05/2025 阿仙奴 vs 般尼茅夫

足球資訊 | 英格蘭超級足球聯賽(2024/25) | 發布日期: 03/05/2025

比賽日期	主隊	客隊	主勝機率	和局機率	客勝機率
2025-05-04 00:30	阿仙奴	般尼茅夫	67.5 %	18.0 %	14.5 %

主勝機率	和局機率	客勝機率
67.5%	18.0%	14.5%

排名: 英超(2) vs 英超(10)

英超冠軍已經塵埃落定，歐洲賽資格爭奪戰仍然競爭激烈。聯賽仲有四場，排2-5只差7分，阿仙奴數字上仲未穩奪歐聯一席，聯賽仍然唔能夠鬆懈，但近況就麻麻，上星期嘅和波已經係今季第13場。對手般尼茅夫今季曾經遇強越強，被認為係本季奇葩，有力爭取歐聯一席，近期比較飄忽，聯賽前半版爭崩頭，失分幾場已經跌落中游位置，要下季踢歐洲協會聯賽，嚟緊幾場就要搏盡。

阿仙奴以強勁氣勢主場出擊巴黎聖日耳門，開賽冇幾耐先失波，被PSG狂攻，連主場球迷打氣聲都變得疲弱，擅長嘅死球戰術由美連奴(Mikel Merino)頂入罰球又被判詐糊。喺湯馬斯 (Thomas Partey)停賽下，中場硬度欠奉，如果對手把握力強啲，阿仙奴已經唔止輸0:1。返到聯賽，要考慮幾日後嘅歐聯大戰，阿迪達就唔會同你搏，鋒線上對PSG極具威脅嘅薩卡(Bukayo Saka)大有機會好似上場對水晶宮咁先列後備。托沙(Leandro Trossard)近期越踢越勇，近五場聯賽3場有進帳，將會繼續被委以重任。上場沙利巴(William Saliba)犯錯令對手追和，阿仙奴防守上必須集中，以防般尼茅夫嘅快速反擊。

般尼茅夫季初表現突出，高強度壓迫踢法加上流暢組織，令唔少強隊吃盡苦頭。贏過曼城同阿仙奴，作客4:1大勝紐卡素，主場5:0大數諾定咸森林，但又和熱刺同輸比葉士域治，近八場只贏過一場，球隊今季有明顯進步，但欠缺穩定。季初古華特(Justin Kluivert)腳風順，近期就有五場入3球嘅伊雲尼遜(Evanilson)接捧，雖然對曼聯喺比賽尾段領紅，球會上訴得直，呢場將可以繼續拍施曼尤 (Antoine Semenyo)攻堅，上場1:1賽和曼聯嘅入球就係靠呢對拍檔嘅合作。施曼尤今季英超射門次數比沙拿同彭馬都要多，喺對手禁區觸球次數，亦只僅次沙拿。

般尼茅夫同富咸，白禮頓喺聯賽榜只差一分，三隊都爭緊歐洲協會聯賽一席。阿仙奴雖然近期聯賽勢弱，如果能收拾周中輸波嘅心情，重整旗鼓，有主場球迷支持，絕對有能力取得勝利，下星期歐聯大戰前提升士氣。

分類:

足球資訊

04/05/2025 阿仙奴 vs 般尼茅夫

分類:

標籤:

關於我們:

快速連結:

聯絡我們: