西班牙與法國近年喺國際賽多次有嚟真交手，雙方贏波就似梅花間竹：就喺2024年歐國盃四強，西班牙就以2:1戰勝法國及後贏埋冠軍，而2021年歐國聯決賽則由法國以2:1取勝，雙方本已經好熟對方打法，但今場雙方人選同狀態都未算得上係最好，今期所謂嘅歐國聯盃賽四強亦有可能成為雙方試人試陣嘅場合。

法國隊長麥巴比（Kylian Mbappe）轉投皇家馬德里之後單季累積射入43球，喺西甲獨取31球亦令佢贏得首個歐洲金靴獎殊榮，但喺國家隊就出現極大對比：麥總「留力」缺席多場國家隊賽事，就算單計有落場嘅比賽，亦已係連續七場冇波入。另一方面，佢又極尷尬地遇上一離開巴黎聖日耳門球會就贏得歐聯冠軍，而一眾PSG奪冠功臣迪比利（Ousmane Dembele）、盧卡斯靴南迪斯（Lucas Hernandez）以至對手國際米蘭嘅馬古斯杜林（Marcus Thuram）、柏華特（Benjamin Pavard）等球員都奉旨延遲歸隊。咁還未止，就連嚟自皇馬嘅麥總、曹亞文尼（Aurelien Tchouameni）都離奇地有得去到臨集訓當日先至現身。喺咁嘅情勢下，我哋喺歐聯決賽推薦要留意嘅翼鋒杜爾（Desire Doue，歐聯決賽獨得2入球1助攻、星期二先至剛剛夠20歲）都未必及得上首次入選嘅里昂新貴卓基（Rayan Cherki）搶鏡。主要踢右翼嘅卓基今季為里昂貢獻多達20個助攻，已傳出有多家英超球隊想斟佢過檔，難怪佢越級踢法國U23僅僅兩場就要提升上大國腳一試身手。

西班牙方面較為矚目係協助貝迪斯殺入歐協聯決賽嘅33歲攻中伊斯高（Isco）闊別六年後重返國家隊，此外教練迪拉富安特喺後場嘅選擇亦顯得較為被動：佢喺欠缺仍在養傷嘅拉樸迪之下，中堅位置就只能繼續試驗夾埋只有38歲兼7場經驗嘅古巴斯（Pau Cubarsi，巴塞）與及侯辛（Dean Huijsen，般尼茅夫），反而已成為皇馬防守要員嘅22歲新紮中堅魯爾阿辛斯奧就仍未獲得徵召，確係有啲可惜。臨場方面，呢隊西班牙都係睇耶馬（Lamine Yamal）、莫拉達（Alvaro Morata）、歷高威廉斯（Nico Williams）呢枝三叉戟能否複製去年EURO嘅高光時刻。（歐協男足X圖片）