歐國聯決賽週上演首場四強，有主場之利嘅德國將會喺慕尼黑擺下擂台招呼葡萄牙。如果望番2021年U21歐洲盃決賽德國對葡萄牙，當年對碰嘅多位德國U21成員如今都喺大國腳嶄露頭角，其中攻中梅斯亞拉、舒洛達碧克更已成為大國腳正選、係三月時八強淘汰意大利嘅主力。可惜今期呢兩位要員都因傷未能入選，同期傷埋嘅更有中堅魯迪加、上緊位嘅中鋒基蘭迪安斯以及中場安祖路史迪拿，波及範圍已差唔多係常用陣容嘅一半。中鋒攻力方面應係今期最受影響嘅一環，富高洛（Niclas Füllkrug）長期養傷今屆只喺第一場有參加，而自四月復出以嚟喺韋斯咸表現亦只係一般，所以佢都承認要同雲達不來梅時期嘅後輩、首次入選嘅禾達美迪（Nick Woltemade）爭位，再加上同屬2021 U21冠軍隊嘅貝卡特（Jonathan Burkardt）今期都只能以補選身份入隊，預計安達夫（Deniz Undav）將要負起攻門重責，同時亦意味住德國嘅進攻要更為依賴當年U21決賽班底艾迪耶美（Karim Adeyemi），以至新近被傳利物浦出價億二歐羅求購嘅穫斯（Florian Wirtz，圖右）。

葡萄牙方面，當年U21決賽正選都有四位成為大國腳主力，今期就算曼聯翼衛達洛治因傷落選，餘下嘅門將迪奧高哥斯達（Diogo Costa）、中場域天拿（Vitinha）同前鋒里奧（Rafael Leao）都會係成隊葡萄牙喺C.朗拿度（Cristiano Ronaldo）以外嘅依賴對象。葡萄牙今期較令人擔憂嘅會係個別主力嘅狀態：般奴費南迪斯（Bruno Fernandes）星期五先至喺香港踢完友賽回程、域天拿有得喺慕尼黑提前踩草，但呢場歐聯決賽係星期六先至上演，要知道喺同一時間，齊人嘅德國隊已經開始咗操練，加上頗得德國球員歡心嘅助教辛度華拿簽咗奧格斯堡坐正，完成埋歐國聯就會走人，德國方面就算失去多位正選但都應可以用主場之利再加團結搭救，用最好嘅表現送別華拿。（利華古遜X圖片）