德國同法國挑戰歐國聯冠軍失敗，嚟緊星期日晚只能爭季軍。場波難得喺香港時間夜晚九點就開波，所以就算兩隊人腳唔齊，都可以當係了解一下雙方嘅支援部隊去到咩級數。

德國喺四強賽空有主場之利，缺少大量大牌球員之下教練拿高士文仍以試陣為先，上場對葡萄牙排出一個3-4-3陣型，就算有攻中穫斯（Florian Wirtz）先入一球最終都係俾牌面級數較好嘅葡萄牙反超。對手法國同樣缺少多位猛將，其中以後防災情尤為嚴重，四強俾西班牙射入多達五球，輸得較為入肉。法國教練迪甘斯延續安察洛堤教皇家馬德里嘅打法，將麥巴比（Kylian Mbappe）放喺中鋒位置，就有少少犧牲咗今季成功轉型做中鋒嘅迪比利（Ousmane Dembele），亦令佢哋連同新打起嘅杜爾（Desire Doue）及奧利斯（Michael Olise）四箭齊發都得物無所用，反而係輸到1:4之後換入場嘅人氣新星卓基（Rayan Cherki）一如所料搶盡風頭，憑佢獨取一個入球兼一個助攻，協助法國追至4:5完場叫做冇咁難睇。

卓基嘅彈起並唔係偶然。呢位里昂右翼繼曼城傳出要買之餘，就連最近同利華古遜就穫斯交易談判陷入膠著嘅利物浦，都開始傳出要搵卓基做plan B，如今兩個傳聞中嘅人物對碰亦令場波增加咗話題性。再加上迪比利、巴高拿（Bradley Barcola）都已確認因傷提早退隊，杜爾、奧利斯、卓基三位新秀大可以調換位置嚟打，迪甘斯亦都可以留麥巴比喺中鋒位置繼續做測試，令德國防不勝防。