歐國聯將喺今晚深夜上演第四次決賽。葡萄牙、西班牙已成為歐國聯呢個相對「後生」嘅盃賽嘅常客，西班牙已係參加過兩次決賽取得一勝一負，而首屆冠軍得主葡萄牙今次則係第二度殺入決賽。

葡萄牙喺四強階段把握到對手德國嚴重缺人嘅契機，最終憑祖雲達斯前鋒法蘭斯高干斯卡奧（Francisco Conceicao）與及老大C.朗拿度（Cristiano Ronaldo）先後建功反勝東道主德國2:1。呢場勝利唔單止係葡萄牙自2000年歐國盃以來首次擊敗德國，亦係C朗踢國家隊以嚟第一次贏到德國，具有雙重象徵意義。新星例如門將迪奧高哥斯達（Diogo Costa，波圖）與及左閘紐奴文迪斯（Nuno Mendes，PSG）嘅穩定表現，亦為葡萄牙帶嚟活力和自信。

至於衛冕嘅西班牙，佢哋喺四強賽中以驚心動魄嘅5:4擊敗法國，展示出強大嘅攻擊力。佢哋個中堅位置實戰經驗可能係相對較為少，但開初總算係有效壓制到法國嘅進攻，嚟緊有望再提升表現。出自巴塞嘅18歲天才耶馬（Lamine Yamal）再一次大放異彩，貢獻兩入球一助攻成為西班牙晉級關鍵。耶馬嘅速度與創造力令對手防線不斷受壓，配合另一翼歷高威廉斯（Nico Williams）同樣發光發熱（一入球一助攻），所以就算教練迪拉富安特冇放莫拉達（Alvaro Morata）落場，中鋒位置單用奧耶沙巴（Mikel Oyarzabal）都足以維持到前線三叉戟嘅整體火力，實在恨死隔離。

「雙牙」過往對賽紀錄明顯向西班牙傾斜（18勝16和6負），尤其自2004年歐國盃後葡萄牙未曾喺正賽擊敗過西班牙，令西班牙更添信心。若然西班牙真係「冧莊」，就會係繼去年歐國盃之後再一次喺德國地頭捧盃。