今季歐聯開波前，又點會有人估得到意甲咁多隊就只得阿特蘭大可以殺入十六強。回顧意甲其他歐聯代表：拿玻里遇強即輸早已唔喺競爭之列，但就連國際米蘭、祖雲達斯都筋疲力歇同喺附加賽階段墮馬則較為意外。四隊之中現時聯賽排名最低嘅阿特蘭大都唔係順風順水，佢哋踢附加賽首回合仍係淨輸緊0:2，但次回合番到主場竟可以4:1反勝並以總比數4:3淘汰對手，佢哋嘅不屈精神與及主場威力可見一斑。

阿特蘭大今季初表現平庸，甚至已被視為意甲中游難以喺歐洲賽場再興風浪，而季中換帥則成為咗轉捩點，新教練柏拿甸奴上任後重拾高位迫搶戰術，攻守漸取得平衡之後已連續兩個月穩佔意甲第七位，勢將再度衝擊下季歐洲賽席位。近況方面，後防絕對主力史卡雲尼（Giorgio Scalvini）缺席咗上週末主場對烏甸尼斯嘅意甲，今仗未必可以落場惡鬥拜仁。至於進攻方面，阿特蘭大喺冬窗期間同馬德里體育會嚟咗一次有趣嘅「球員交易」，將喺非洲盃同隊友爭食嘅前鋒陸文換成首半季喺馬體會踢唔上主力嘅拉斯柏度尼（Giacomo Raspadori）。拉斯柏度尼番到老家意甲有望踢得番之前喺拿玻里時嘅水準，雖然佢同樣因傷錯過咗對烏甸尼斯場波，但佢較大機會今場可以復出。暫時所見隊波嘅最大依靠仍係由迪魯恩（Marten de Roon）與及薩利夫斯基（Nicola Zalewski）率領嘅一條中場線。

作客嘅拜仁慕尼黑近期要面對嘅傷兵問題則更為微妙。佢哋上星期五大炒慕遜加柏，竟然遇上前鋒哈利卡尼（Harry Kane）近15個月以嚟首次因傷缺陣。教練甘賓尼話就話哈利卡尼只係小腿有輕傷可以復出鬥阿特蘭大，但更大鑊係門神紐亞（Manuel Neuer）休養兩場復出即刻再傷，好大機會錯過晒兩回合，而二號門將埃碧（Jonas Urbig）上季八強則有主、客兩鬥國米各失兩球嘅尷尬紀錄，稍為令人擔心。

今場比賽係雙方首次碰頭，牌面較弱嘅阿特蘭大先踢主場大可以趁拜仁人腳、狀態都未喺頂峰放手一搏。其實阿特蘭大今季在歐聯主場表現不俗，錄得三勝一和一負的戰績，雖然意外不敵畢爾包，但亦曾以2:1擊敗世冠冠軍車路士。拜仁中場大腦甘美治（Joshua Kimmich）趁較早前作客多蒙特就順便打探情報，多特球員都有同佢反映阿特蘭大主場草地唔靚、而主隊球迷氣氛卻又極之好，拜仁今仗必需謹慎行事。

預計兩隊正選陣容：

【阿特蘭大】
Carnesecchi - Djimsiti, Hien, Kolasinac - Zappacosta, de Roon, Mario Pasalic, Bernasconi - Zalewski, Samardzic - Scamacca

【拜仁慕尼黑】
Urbig - Stanisic, Upamecano, Tah, Laimer - Kimmich, Pavlovic - Olise, Gnabry, Luis Diaz - Kane

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。