拜仁慕尼黑不經不覺喺德超盃、德甲、德國盃、歐聯已經足足全勝贏咗12場，繼上週末以2:1擊敗多蒙特，短短幾日後再喺歐聯分組賽4:0大炒布魯日，其中年僅17歲嘅攻中卡爾（Lennart Karl）更取得升上一隊以嚟的首個入球，同時成為拜仁最年輕嘅歐聯入球者。呢兩場波顯示咗球隊喺高壓環境下仍能交到貨，呢度連勝嘅氣勢唔單止提升到士氣，亦為主帥甘賓尼帶嚟戰術用人上更大嘅自信同埋主導權。

但正如拜仁開季前參與世冠盃一樣，一班球員既可以話係提前磨合，亦可以話係提前勞損，更加唔好提梅斯亞拉自八強對PSG受重傷就一直缺陣呢筆糊塗賬。甘賓尼嘅換人頻率對於拜仁嚟講算係偏高，或者本來就只係因為要向現實低頭，咁依家既然換到成果，亦自然繼續維持落去。隨著歐聯、德國盃賽程陸續加密，拜仁嘅團隊接下來將要更加好好管理一班核心球員嘅出場時間。

講咗咁耐，終於都要介紹到左邊呢位光頭仁兄，佢就係慕遜加柏從薩爾斯堡撬番嚟做體育總監嘅Rouven Schröder。呢幾年慕遜加柏不斷坐過山車，球隊從換球員、換教練（踢咗三週就炒咗施奧安尼），如今終於問責問到體育總監Roland Virkus頭上。Virkus主要嘅「罪狀」在於陣容規劃上過於依賴年輕化同主打買平貨，導致一面對牌面較強嘅對手時當堂冇晒板斧、自亂陣腳。Schröder一上任即表明要即刻處理球隊後防薄弱同嚟緊將有一大堆球員合約到期嘅問題，並喺冬季轉會窗主動出擊，補番一兩名防守球員，而短期內可以即刻做嘅，則會從穩住防線紀律、加強訓練防守死球等幾個方向執番隊波。

參考番慕遜加柏上一輪聯賽作客柏林聯輸夠1:3嘅呢場波，佢曝露出慕遜加柏守死球嘅處理欠火喉、回防秩序鬆散、欠缺速度等問題，但同時亦見到借用嘅前鋒泰巴高域（Haris Tabakovic）繼續入波（近四場入三球），佢嘅空中威脅係慕遜加柏現時僅有嘅可靠得分來源之一，若然傷癒復出嘅翼鋒賀路域（Franck Honorat）能盡快重拾狀態改善邊路傳中質素，相信會即時幫到看守教練波蘭斯基唔少忙。

慕遜加柏要走出困境除咗靠自身努力，今場主場迎戰拜仁亦可以嘗試寄望拜仁嘅不穩定因素再次放大。現時除咗攻中基拿比、後衛史坦尼錫好大機會繼續缺陣之外，更有傳拜仁為咗準備星期三德國盃對科隆唔出得停賽嘅紐亞（Manuel Neuer），就連對慕遜加柏呢場聯賽都改用大隻仔埃碧（Jonas Urbig）守龍當係熱身。如果人選調動真係大到咁，就算係長勝之師都難免令人多咗幾分擔憂。甘賓尼係唔係進取到咁，我哋就拭目以待。

 

預計兩隊正選陣容：

【慕遜加柏】
Nicolas - Elvedi, Sander, Diks - Scally, Reitz, Engelhardt, Ullrich - Honorat, Castrop - Tabakovic

【拜仁慕尼黑】
Neuer - Boey, Tah, Kim, Laimer - Kimmich, Bischof - Olise, Kane, Luis Diaz - Jackson

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。