德國超級盃踏入2025年，將正式冠名為「碧根鮑華盃」，以紀念德國足球傳奇「大帝」碧根鮑華。今次超級盃戲碼係最正路嘅上屆德國盃冠軍對上屆德甲冠軍。以德國盃冠軍身分參賽嘅主隊史特加，新球季備戰就唔多順利，佢哋嘅當紅前禾達美迪（Nick Woltemade）擺好晒陣勢想一季即走，而走路目標更係直指今場嘅對手拜仁慕尼黑，令隊內氣氛變得詭異。再加上拜仁長期外借俾佢哋嘅門將紐布爾（Alexander Nübel）新近有傷無法上陣，史特加將難以用最佳陣容同狀態硬碰拜仁。

至於客隊拜仁則要經歷十年嚟少有嘅世代交替浪潮，好多舊名字例如湯馬士梅拿、利萊辛尼都已喺較早前離隊他去，就連京士利高文都因要準備轉去沙職聯艾納斯，今場已經避戰，除此以外更大打擊係新一代中場核梅斯亞拉喺參加世冠盃時重傷，夾夾埋埋即係拜仁踢開4-2-3-1嘅3已經面目全非，上季初報到嘅奧利斯（Michael Olise）搖身一變已成為領軍人物。而拜仁嘅應對就係從利物浦以高價引入哥倫比亞翼鋒路易斯迪亞斯（Luis Diaz），希望佢能夠同中鋒哈利卡尼（Harry Kane）以至中場甘美治（Joshua Kimmich）組成新嘅殺手組合。個plan聽落十分理想，實情係拜仁仍要顧忌自己嗰條後備力量嚴重不足嘅後防線，艾方素戴維斯、伊藤洋輝跨季養傷至今都未復出，教練甘賓尼好大機會要沿用世冠嗰期嘅四人防線迎戰。

第二年教拜仁嘅甘賓尼已經好難同高層講今季KPI係再贏德甲冠軍就算，但事實係呢隊拜仁充滿變數、比上季更加難以預測。今仗如果可以贏到史特加先拔頭籌，相信將有助佢哋喺下星期重啟嘅德甲聯賽有個好開始。（DFL圖片）

預計兩隊正選陣容：

【史特加】
Bredlow - Assignon, Jaquez, Chabot, Mittelstädt - Karazor, Stiller - Leweling, Führich - Undav - Woltemade

【拜仁慕尼黑】
Neuer - Laimer, Upamecano, Tah, Stanisic - Kimmich, Goretzka - Olise, Gnabry, Luis Diaz - Kane