連續第二年有非甲組球隊打入德國盃決賽，今次係由丙組冠軍比勒費爾德挑機甲組失意大軍史特加：比勒費爾德晉級路上連斬四隊德甲對手下馬，絕對唔能夠再視之為等閒之輩，史特加聯賽失手只能以第九名衝線，盃賽冠軍換取嘅歐霸入場券係佢哋保住人腳同面子嘅最後希望。今場決賽獲賽會安排喺香港區做YouTube直播，大家唔好錯過。

今屆德國盃未似上屆咁有多支非甲組球隊殺出搞局，但比勒費爾德呢支丙組仔似乎比上屆決賽嘅德乙代表凱沙羅頓更爆，晉級過程中先後淘汰柏林聯、弗賴堡、雲達不來梅同利華古遜四隊甲組波，尤其係四強以2:1擊敗咗衛冕冠軍利華古遜，展現咗非凡嘅戰鬥力同韌性。喺聯賽方面，比勒費爾德更係喺最後一週反超德累斯頓戴拿模拎咗德丙冠軍，昂首殺入決賽英雄地柏林奧林匹克球場。今季比勒費爾德主打穩守配合高效反擊，其中30歲嘅美籍法裔隊長Mael Corboz鎮守中場中，喺串連球隊攻守上起咗好大作用。而佢嘅中場拍檔Marius Wörl一去到踢德國盃就會移前，今季五場盃賽已共取得三個入球+三個助攻，兩位都勢將成為史特加嘅重點招呼對象。

史特加喺聯賽度過咗失意嘅一季，最尾三場聯賽全勝亦無法令球隊透過聯賽獲得歐戰資格，德國盃冠軍係佢哋進軍歐霸嘅最後機會。史特加咁橋喺德國盃四強與及聯賽尾場都係擊敗RB萊比錫，而四強喺禁區外轟入世界波嘅中場安祖路史迪拿（Angelo Stiller）喺兩週前對奧格斯堡嘅聯賽中受傷，已無法喺煞科日再撼RB，亦極有可能要錯過今次決賽。教練賽S漢尼斯表示到決賽時如有需要，係會叫史迪拿食止痛藥落場救駕，由此可見佢對講究中場控制嘅史特加有幾咁重要。史特加現時嘅入球希望將會落喺今季先至從雲達不來梅過檔嘅禾達美迪（Nick Woltemade）身上。呢位23歲前鋒加盟後出場時間日增，喺聯賽最尾三場都取得入球，德國盃更係除咗因病錯過一場之外其餘四場都識入波，更已獲德國首次召入大國腳參加歐國聯四強賽，戰鬥力不容忽視。（德國足總X圖片）

預計兩隊正選陣容：

【比勒費爾德】
Kersken - Lannert, Großer, L.Schneider, Oppie - Russo - Corboz, Schreck - Sarenren Bazee, Wörl - Grodowski

【史特加】
Nübel - Vagnoman, Jeltsch, Chabot, Mittelstädt - Karazor, Stiller - Leweling, Undav, Führich - Woltemade