話拜仁慕尼黑係史特加嘅剋星，聽落好似好虛無飄渺：當今德甲有邊隊唔係俾拜仁恰丫？咁或者試吓單計德國盃：兩隊歷來交手10次，拜仁已錄得9勝0和1負嘅壓倒性優勢，史特加上次喺德國盃擊退拜仁已經要數番上1988/89球季嘅十六強，而兩季對上一次喺德國盃碰頭咁啱又係決賽（2012/13），當年嘅拜仁已經喺倫敦拎咗個歐聯獎盃番嚟開打，最終亦一如所料袋埋個德國盃湊夠三冠王。唔講遠講番近啲，今季開季前雙方亦曾喺一場過嘅小型盃賽相遇，當時拜仁作客史特加踢德國超級盃，應屆德甲冠軍拜仁都係照贏應屆德國盃冠軍史特加，往績上、心理上拜仁都係佔晒上風。

而史特加嗰邊相信亦都已經調整好晒心情迎接呢場決賽。就喺上週末德甲煞科日，史特加作客頹足全季嘅法蘭克福，雖然兩度領先都係要俾主隊追平2:2，不過好在同時間賀芬咸、利華古遜都失分，史特加仍能以聯賽第四名身份衝線，奪得來季歐聯資格，換個講法，即係教練施巴斯坦漢尼斯自2023年接過爛攤子打護級附加賽之後，就已經為史特加連續三屆獲得歐洲賽事嘅資格。

史特加尾場僅和都仍能夠達標，賽後一眾球員心態都明顯輕鬆，就算有得參加世界盃都預咗只係做副手嘅前鋒安達夫（Deniz Undav）更公開表示，球隊既定目標已經達成，仲話嚟緊嘅德國盃決賽只屬於「甜品」，用呢種放鬆態度迎戰暫時「只得」一個大賽冠軍嘅拜仁慕尼黑，都唔知是好是壞。

拜仁歐聯四強止步無緣再做一次「三冠王」，一眾江東父老已經十分失望，加上拜仁近年經常喺德國盃意外翻船，今季早已落晒order唔可以放輕處理，事到如今德國盃榮銜已成為量度拜仁今季係唔係達標嘅最後一項指標。咁拜仁係唔係有完全壓倒性嘅優勢呢？參考近兩季聯賽成績可以答「係」，事關兩隊近四次聯賽碰頭，拜仁全勝之餘更係每場至少射入三球。但當再結合埋五月尾世界盃參賽國陸續公佈人選名單嘅呢段時期去諗，拜仁陣中例如梅斯亞拉（Jamal Musiala）、甘美治（Joshua Kimmich）、哈利卡尼（Harry Kane）、迪亞斯（Luis Diaz）、奧利斯（Michael Olise）等一大堆列強主力難免會稍為收油，就連哈利卡尼都已經打破埋利雲度夫斯基嘅德甲球員單季入球紀錄，連虛榮都再無需要去爭。此外呢幾日更不斷傳出40歲門將紐亞（Manuel Neuer）只要今期保得住身體健康，就會出山重返德國國家隊遠征世界盃，話唔定到決賽又會叫22歲副手埃碧（Jonas Urbig）捱義氣頂多一場（雖則埃碧都好有機會俾德國主帥拿高士文睇中），喺諸多因素影響之下，拜仁近年對史特加嘅統治力到時或會有所收斂。

（直播link在此）