德甲賽前分析(10/05/2025-12/05/2025)

足球資訊 | 德國甲組足球聯賽(2024/25) | 發布日期: 09/05/2025

10/05/2025 02:30 禾夫斯堡(德甲12) vs 賀芬咸(德甲15)
禾夫斯堡近八場踢出二和六負，教練Hasenhüttl同前鋒 Behrens衝突亦令前者提前執包袱，餘下兩場由U19教練撐場。加上隊長Arnold要繼續停賽，今季聯賽盃賽雙殺賀芬咸就無謂再睇得咁重。

10/05/2025 21:30 柏林聯(德甲13) vs 海登咸(德甲16)

海登咸同波琴嘅榜尾逃生大戰只能以0-0結束，雖然未能取勝，但教練Schmidt對球隊表現表示滿意。主隊柏林聯上場早早落後兩球下追平雲達不來梅，球員就算欠缺明確目標但仍然打得出朝氣與韌勁。

10/05/2025 21:30 波琴(德甲18) vs 緬恩斯(德甲7)

波琴上場打和海登咸兩敗俱傷，隊長Hofmann傷出更成為球隊今場進攻上嘅一大隱憂。波琴今場拎盡三分都有機會直接降班，更何況緬恩斯仍要力爭久違嘅歐洲賽席位。

10/05/2025 21:30 基爾(德甲17) vs 弗賴堡(德甲4)

今季護級分子之中就只有基爾俾到掙扎，近三場兩勝一和已非正路分析所能理解，弗賴堡個歐聯位開始不穩但作客遇著呢個對手認真唔啱時候。

11/05/2025 00:30 拜仁慕尼黑(德甲1) vs 慕遜加柏(德甲9)

慕遜加柏延續後防穿窿嘅近況，對住賀芬咸都失夠四球，基本上已係歐賽夢碎，呢個格局正啱晒為最後一次喺安聯踢正賽嘅拜仁老將Thomas Müller餞行。

11/05/2025 21:30 利華古遜(德甲2) vs 多蒙特(德甲5)

多蒙特重整隊型後四月至今踢出四勝一和，誓要用埋最後啖氣衝番上歐聯區。利華古遜靈魂人物Wirtz據傳已向好大機會離隊嘅教練沙比提出要轉會拜仁，佢哋兩個今場唯一目標就只係向主場球迷好好道別。

11/05/2025 23:30 法蘭克福(德甲3) vs 聖保利(德甲14)

聖保利牌面咁弱但好多場波都只係一球上落，門神Vasilj應記首功，而今場正值佢要停賽（上場對史特加兩黃一紅）。法蘭克福同直接競爭對手緬恩斯上星期賽和1:1尚算合理，今場預料將會明恰後防缺人嘅聖保利。

12/05/2025 01:30 史特加(德甲10) vs 奧格斯堡(德甲11)

史特加上星期作客小勝聖保利1:0，總算終止咗三場不勝。奧格斯堡上岸後俾機會新人嘅承諾持續兌現，19歲中場Kömür喺近三場不勝嘅比賽之中落場時間大幅提升。