17/05/2025 弗賴堡 vs 法蘭克福

足球資訊 | 德國甲組足球聯賽(2024/25) | 發布日期: 16/05/2025

比賽日期	主隊	客隊	主勝機率	和局機率	客勝機率
2025-05-17 21:30	弗賴堡	法蘭克福	43.8 %	24.8 %	31.4 %

主勝機率	和局機率	客勝機率
43.8%	24.8%	31.4%

排名: 德甲(4) vs 德甲(3)

直播資訊: Now 639, NowE, beIN Sports

今季德甲嚟到最後一輪，開波前就只有頭二同尾二係定咗，歐洲各級賽事嘅入場券與及護級附加賽都未定實，其中第三至第六名就仍然爭崩頭。星期六晚九場德甲同步晚上九點半開波，電視台都好識做，揀咗排第三、四嘅呢場弗賴堡對法蘭克福呢場涉及幾百萬上落嘅大波做直播。

隨住多蒙特季尾上力越戰越勇（六勝一和），最尾一場更只係要對住降硬班嘅基爾，不論係弗賴堡（開賽前55分）定係法蘭克福（開賽前57分），都應預咗蜜蜂兵團會盡數基爾以57分壓線。咁到時如果法蘭克福輸波，就會係一口氣俾弗賴堡、多蒙特超車，只能認命打番歐霸，但又如果係賽和，弗賴堡即會從打歐聯嘅第四位跌落得番個歐霸盃嘅第五位，即係要焗攻嘅係主隊弗賴堡。

法蘭克福近六場只能踢出二勝四和，歇冬後接替馬莫殊擔正嘅前鋒伊基迪基（Hugo Ekitike）亦已係兩場冇波入。早前分析法蘭克福時都未免對哋太過有信心，就算估得到作客緬恩斯有機會失分，但又點估得到上星期主場對住正選門將停賽嘅聖保利都會被追和。雖然話聖保利矢志護級會打高半班波，但法蘭克福主場出擊都要踢到老鼠拉龜就難免令大家質疑佢哋有冇足夠嘅信心同韌力衝到最後。

主隊弗賴堡捱過咗三月嘅不勝低潮，四月份表現脫胎換骨，錄得四勝一和一負，排名亦由第七躍升番上第四，上週作客面對瘋狂反撲想護級嘅基爾都照樣勝出，不論係前面不斷交出入球同助攻嘅盧卡斯賀拿（Lucas Höler）同埋基利科（Vincenzo Grifo），抑或門將艾圖布魯（Noah Atubolu），狀態都處於高位，而同期較為沉靜嘅則要數到全隊身價最高嘅日本翼鋒堂安律（圖左）。今季聯賽錄得九個入球八個助攻嘅堂安律最近三場已冇再添紀錄，加上盛傳佢會喺完季後出走，緋聞對象當中更包括今場嘅對手法蘭克福，又確係有啲尷尬。更邪嘅係弗賴堡近四次主場都贏唔到法蘭克福，對於打和已經夠晒數嘅法蘭克福嚟講又會再增添心理優勢。（法蘭克福X圖片）

預計兩隊正選陣容：

【弗賴堡】
Atubolu - Rosenfelder, Ginter, Lienhart, Makengo - M.Eggestein, Osterhage - Doan, Manzambi, Grifo - Adamu

【法蘭克福】
Trapp - Collins, R.Koch, Theate - Kristensen, Skhiri, Brown - O. Höjlund, Larsson - Ekitike, Knauff

分類:

足球資訊

17/05/2025 弗賴堡 vs 法蘭克福

分類:

標籤:

關於我們:

快速連結:

聯絡我們: