03/05/2025 RB萊比錫 vs 拜仁慕尼黑

足球資訊 | 德國甲組足球聯賽(2024/25) | 發布日期: 02/05/2025

比賽日期	主隊	客隊	主勝機率	和局機率	客勝機率
2025-05-03 21:30	RB萊比錫	拜仁慕尼黑	31.4 %	21.8 %	46.8 %

主勝機率	和局機率	客勝機率
31.4%	21.8%	46.8%

排名: 德甲(1) vs 德甲(5)

直播資訊: Now 639, NowE, beIN Sports

拜仁慕尼黑星期六開賽前領先利華古遜8分，淨得失球差多對手整整30個，而利華作客弗賴堡要遲一日開打，即係拜仁只需要按自己部署同節奏去踢就得，三分盡擸嘅話就唔洗等星期日可以直接喺紅牛球場慶祝吓先（而就算打和然後利華贏波，後者都只係數字上未玩完）。有趣係拜仁主力射手哈利卡尼（Harry Kane，圖左）出道至今從未贏冠，而拜仁有機會重獲冠軍呢一場又咁橋輪到卡尼儲夠五張黃牌停賽，就算唔出現「拜仁冇卡尼先贏到冠軍」嘅meme，亦有口痕友講定「卡尼今次贏嘅只係（沙律）『碟』，都仍係未贏到『盃』」：要笑嘅話總有位笑，卡尼今季已經好難追平上季初登德甲嘅36球入波紀錄（暫時24球），但助攻已超越上季去到9個，最終順利一嘗夙願嘅話，佢絕對係頭號功臣之一。

講番轉頭，拜仁會唔會「唔覺意」跌兩分將個氣氛hold住？筆者認為關鍵始終在於主隊RB萊比錫本身都未在狀態：上場波RB喺後防線天殘地缺之下作客法蘭克福慘遭血洗4:0，今場就算左閘大衛拉林（David Raum）可以復出，中堅兼隊長奧班與門將古拿斯缺席帶嚟嘅不穩定性仍然好大。拜仁方面後場再有拉菲爾古里路受傷缺席，金玟哉亦一直有傳係勉強死撐，今場隨時得番俾隊報踢爆下季改投摩納哥嘅迪亞（Eric Dier，圖右）領軍，但前場尚有fit馬奧利斯（Michael Olise），再加上利萊辛尼（Leroy Sane）仍未續到約，相信拜仁前場仍有一定嘅進攻意欲。

紅牛高層對於看守教練Z. Löw唔多滿意已係公開秘密，而佢哋嘅頭號目標就係要喺科木同西班牙少帥法比加斯續約之前搶佢番嚟，以延續RB起家嘅快速反擊風格。大衛拉林做訪問時好識做咁話依家唔只係教練嘅問題，所有球員亦都需要負上責任，當爭取歐聯席位已開始陷於被動境地（馬高路斯被炒前意外打敗嘅多蒙特，及後五場搶夠13分已只係落後RB一分），全隊更需要調整心態、抱住同一目標盡搏。咁係唔係最終失敗就各自閃？醒目仔拉林就話現階段唔會諗呢樣嘢住。

分類:

足球資訊

03/05/2025 RB萊比錫 vs 拜仁慕尼黑

分類:

標籤:

關於我們:

快速連結:

聯絡我們: